जर्जिया (एजेन्सी)– इङ्ल्यान्डले यु १९ युरोपियन च्याम्पियनसिप फुटबलको उपाधि जितेको छ । पोर्चुगललाई २–१ ले हराउँदै इङ्ल्यान्डले जर्जियामा सम्पन्न यु १९ युरोपियन च्याम्पियनसिपको उपाधि जितेको छ । उमेर समूहको प्रतियोगितामा इङ्ल्यान्डले दुई महिनामा जितेको यो तेस्रो उपाधि हो ।
लुकास मेचाको निर्णायक गोलको खुसी मनाउदै इङ्ल्यान्डका युवा टोली ।
लुकास मेचाको निर्णायक गोलमा इङ्ल्यान्ड उपाधि जित्न सफल भएको हो । खेलको ५० औं मिनेटमा एस्टन भिल्लाका इसाह सुलिमानले इङ्ल्यान्डलाई अग्रता दिलाएका थिए ।
तर चेल्सीका डुजोन स्टरलिंगले ५६ औं मिनेटमा आत्मघाती गोल गरेपछि पोर्चुगल खेलमा फर्किएको थियो । म्यानचेस्टर सिटीका स्ट्राइकर मेचाले ६८ औं मिनेटमा गरेको गोल निर्णायक बनेपछि इङ्ल्यान्ड विजयी बनेको थियो ।
खेलको ८० औं मिनेटमा फुल्ह्यामका टायो एडुन दोस्रो पहेलो कार्डको सामना गर्दै मैदानबाट बाहिरिएपछि १० खेलाडीमा सिमित भएपनि इङ्ल्यान्डले अग्रता जोगाएको थियो ।
समुह चरणको विजेताको रुपमा प्रतियोगितामा अघि बढेको इङ्ल्यान्डले चेक रिपब्लिक र जर्मनीलाई हराउँदै फाइनल पुगेको थियो । यसअघि इङ्ल्यान्डले यु २० विश्व कप र जुनमा टुलोन कप जितेको थियो ।
