एजेन्सी – स्पेनिस क्लब बार्सिलोनाली पेरिस सेन्ट जर्मन (पिएसजी)ले ब्राजिलियन सुपरस्टार नेयमारको रिलिज क्लज तिरेको खण्डमा उनलाई बिक्रि गरेर एएस मोनाकोका किलियन बाप्पेलाई भित्र्याउने तयारी गरेको छ। नेयमारको बार्सिलोनासँगको सम्झौता अनुसार पिएसजीले उनलाई क्लबमा भित्र्याउन चाहेमा २ सय २२ मिलियन युरो तिर्नुपर्ने प्रावधान रहेको छ।

बार्सिलोनाले गत सिजन नेयमारलाई कुनै हालतमा पनि नबेच्ने बताएपनि नेयमारले विगत केहि सातायता दिंदै आएको अभिव्यक्ति र गत सिजन उनको मैदानबाहिरका घटनालाई मध्यनजर गर्दै क्लबले ठुलो प्रस्ताब आएमा स्वीकार्ने बुझिएको छ। गत सिजन नेयमार च्याम्पियन्स लिगका केहि खेलपश्चात जस्टिन बिबर, लेविस ह्यामिलटन लगायत अन्य सेलिब्रिटीहरुसँग पार्टीमा गएको र त्यसले उनको प्रदर्शनमा असर पारेको तथ्य सार्वजनिक भएको थियो।

यस्तै, बार्सिलोनाका प्रशिक्षक उन्जुएले नेयमारलाई खेल मैदानबाहिर धेरै ध्यान नदिने सुझाव दिंदा नेयमार र प्रशिक्षक उन्जुए बीच भनाभन पनि भएको थियो। त्यस समयका मुख्य प्रशिक्षक लुइस इन्रिकेले नेयमारलाई त्यस समय माफी माग्न सुझाएका थिए।

बार्सिलोनाले यस्तै विविध कारणले गर्दा नेयमारलाई उचित रकमको प्रस्ताब आएमा छाड्ने मनस्थिति राखेको छ। यता नेयमार भने बार्सिलोनामा रहेर उनले कहिलेपनि ब्यालोन डी’ओर जित्न नसक्ने सोच राखेको बुझिएको छ। मेस्सी र सुआरेजको उपस्थितिमा नेयमारको सम्भावना कम रहेकाले उनले क्लब छाड्न चाहेको केहि प्रेसले लेखेका छन्।

यद्दपी नेयमारलाई बेचेको खण्डमा बार्सिलोनाले एएस मोनाकोका किलियन बाप्पेलाई खरिद गर्ने लगभग पक्का हुनेछ। युवा अवस्थामा रहेका बाप्पेलाई खर्च गर्ने पैसा नेयमारको स्थानान्तरणबाट जम्मा गर्ने लक्ष्य पनि बार्सिलोनाको हुनेछ। त्यसबाहेक बाँकी रकमले पिएसजीकै मार्को भेर्राट्टी अथवा अन्य खेलाडी पनि किन्न सक्नेछ। नेयमारको तुलनामा बाप्पे युवा रहेको र उनमा अझै सुधार ल्याउन सकिने हुनाले बार्साले बाप्पेलाई ताकेको हो।