बार्सिलोना (एजेन्सी)– नेयमारको भविष्यको बारेमा निर्णय गर्ने जिम्मेवारी बार्सिलोनाले नेयमार उनका बाबुको हातमा छोडेको छ । ब्राजिलियन स्ट्राइकर नेयमारलाई भित्राउन फ्रेन्च क्लब पेरिस सेन्ट जर्मेन (पिएसजी) लागि परेपछि बार्सिलोनाले भविष्यको निर्णय गर्ने जिम्मेवारी उनीहरुलाई नै सुम्पेको बुझिएको छ ।

पिएसजी २ सय २२ मिलियन युरो सुरुवा रकम तिरेर भएपनि नेयमारलाई लाने सोचमा रहेको यसअघि नै सार्वजनिक भइसकेको छ । नेयमारका लागि त्यो सुरुवा रकम तिरिएमा त्यो अहिले सम्मको विश्व कीर्तिमानी सरुवा रकमको ठिक दोब्बर हुनेछ ।

२५ बर्षे स्ट्राइकर पिएजसी जाने बलियो सम्भावना रहेको र सुरुवा ९५ प्रतिशत निश्चित रहेको श्रोतको दाबी छ । यद्दपी बार्सिलोनाका शीर्ष पदाधिकारीले भने नेयमार क्लबमै खुसी रहेको बताएका थिए । बार्सिलोनका अध्यक्ष जोसेप बार्टोमेउ र उपाध्यक्ष जोर्डि मेस्ट्रेले उनी क्याम्प नोउमै खुसी रहेको र क्लब छोड्ने योजनामा नरहेको बताएका थिए । तर, पछिल्लो समय भने उनीहरुले पनि यो विषयमा बोल्न चाहिरहेका छैनन् ।

नेयमार सन् २०१३ मा सान्तोषबाट बार्सिलोना पुगेका थिए । दुईवटा ला लिगा, तीन वटा कोपा डेल रे र एउटा च्याम्पियन्स लिग उपाधि जितिसकेका नेयमारले बार्सिलोनाका लागि १ सय ८६ खेलमा १ सय ५ गोल गरिसकेका छन् ।