एजेन्सी – इङ्गलिस् प्रिमियर लिग च्याम्पियन चेल्सीले क्लबको इतिहासकै सर्वाधिक रकम तिरेर स्पेनिस च्याम्पियन रियल म्याड्रिडका फरवार्ड अल्भारो मोराटालाई क्लबमा भित्र्याएको छ। चेल्सीले मोराटालाई क्लबमा ल्याउन ६० मिलियन पाउण्ड खर्चेको हो।

२४ वर्षीय स्पेनिस फरवार्ड मोराटाले चेल्सीसँग ५ वर्षे सम्झौता गरेका छन्। उनले प्रति साता १ लाख ५५ हजार पाउण्ड तलब बुझ्नेछन् भने उनको प्रदर्शनको आधारमा बोनसहरु पनि पाउनेछन्। गत सिजन मोराटाले स्पेनिस लिगमा १५ गोल र ४ असिस्ट प्रदान गरेका थिए।

मोराटाले चेल्सीमा आबद्ध भएलगत्तै पत्रकार सम्मेलनमा बोल्दै आफु यस क्लबमा आउन पाउँदा एकदम खुशी रहेको बताए। ‘मा निकै खुशी छु। चेल्सीजस्तो ठुलो क्लबमा रहेर खेल्न पाउनु निकै ठुलो उपलब्धि हो। म यहाँ कडा मेहेनत गरेर सकेसम्म धेरै गोल हान्ने प्रयास गर्नेछु। यहाँ रहेर टोलीका लागि उपाधि जित्नु मेरो मुख्य लक्ष्य हुनेछ।’

चेल्सीका प्रशिक्षक एन्टोनियो कन्टेले पनि मोराटालाई चेल्सीमा आउँदा टोलीलाई निकै फाइदा पुग्ने बताए। ‘हामीले निकै राम्रो स्ट्राइकरलाई टोलीमा ल्याएका छौँ। उनले युवा अवस्थामा निकै उपाधि जितेका छन् र म उनलाई टोलीमा ल्याउन पाउँदा निकै हर्षित छु।’

‘मोराटा हाम्रो क्लबका लागि उत्कृष्ट खेलाडी हुन्। उनले रियल म्याड्रिड र युभेन्टसजस्ता क्लबबाट खेल्दै आफ्नो खेल सिद्द पारिसकेका छन्। उनको युवा जोशसँगैको अनुभव हाम्रो लागि निकै राम्रो पक्ष हो।’

मोराटा अब केहि दिनमै चेल्सीको टोलीसँग सिंगापुरमा जारी प्रि-सिजन टुरमा जानेछन्।