एजेन्सी – म्यानचेस्टर सिटिले रियल म्याड्रिडका डिफेन्डर ड्यानीलोलाई यसै साताभित्र आफ्नो क्लबमा भित्र्याउने अन्तिम तयारी गरेको छ। सिटिले गरेको २७ मिलियन पाउण्डको प्रस्ताव रियलले स्वीकार गरेपछि ड्यानीलो सिटि जाने पक्का भएको हो।

सन् २०१५मा रियल म्याड्रिड आएका ड्यानीलोले रियलमा रहेर राम्रो प्रदर्शन गर्न नसकेपछि क्लबले उनलाई बिक्रि गर्ने सोच बनाएको हो। २ सिजनमा उन्ला ४१ खेल खेल्दै ३ गोल गरेका छन्। सिजनको अन्त्यतिर उनि कर्भाजल र नाचोपछिको रोजाईको खेलाडी बनेपछि प्रशिक्षक जिदानले उनलाई प्रयोग गरेका थिएनन्।

सिटिले यसअघिनै ५० मिलियन पाउण्ड खर्चेर काइल वाल्करलाई भित्र्याएपनि प्रशिक्षक गुआर्डीओलाले भने आफ्नो टोलीलाई बलियो बनाउन कुनै कसर नछाड्ने बताए। उनले मोनाकोबाट लेफ्ट ब्याक बेन्जामिन मेन्डीलाई पनि भित्र्याउने प्रयास गरिरहेको बुझिएको छ। उनले शुक्रबार भएको पत्रकार सम्मेलनमा सिटीले अझै ‘३ वा ४ खेलाडी’लाई क्लबमा ल्याउने प्रयास गरिरहेको बताए।

रियल म्याड्रिड र म्यानचेस्टर सिटि आगामी बुधबार हुने खेलमा आमने सामने हुँदैछन्। दुवै क्लब अहिले अमेरिकामा रहेर प्रि सिजनको खेल एवं प्रशिक्षणमा व्यस्त छन्। सिटीले यसै साता रोमाको प्रस्तावलाई स्वीकार्दै डिफेन्डर एलेक्जेन्डर कोलारोभलाई बिक्रि गरेको छ भने फरवार्ड विल्फ्रिड बोनी र फबियान डेल्फ पनि क्लब छाड्ने तयारीमा छन्।