एजेन्सी – इङ्गलिस प्रिमियर लिग क्लब टोटेनहम हट्स्परले प्रि सिजनको मैत्रीपूर्ण खेलमा फ्रान्सेली टोली पेरिस सेन्ट जर्मेन (पिएसजी)लाई ४-२ले पराजित गरेको छ। पिएसजीले खेलमा अग्रता लिएपनि टोटेनहमले खेलमा फर्कंदै जित हात पारेको थियो।

खेलमा पिएसजीले एडिन्सन कभानीको छैटौं मिनेटको गोलसँगै सुरुवाती अग्रता लिएको थियो। तर क्रिस्टियन एरिक्सनले ११औं मिनेटमा उत्कृष्ट गोल गर्दै खेललाई बराबरीमा ल्याए। उनले करिब ३५ यार्ड टाढाबाट गरेको प्रहार गोलमा परिणत भएको थियो। १८औं मिनेटमा एरिक डायरले दबाब दिन खोज्दा पिएसजीका गोलरक्षक केभिन ट्रयापले प्रहार गरेको बल डायरलाई लगेर गोल भएको थियो। हभिएर पास्तोरेले ३६औं मिनेटमा गोल गर्दै खेललाई पुन: बराबरीमा ल्याएका थिए।

दोश्रो हाफको सुरुवातमै गोलरक्षक ट्रयाप रातो कार्ड खाँदै मैदान छाडेपछि पिएसजी संकटमा पारेको थियो। ट्रयापले बक्सबाहिर निस्केर गोलतर्फ गइरहेको बललाई हातले बचाएका थिए। खेलको ८२औं मिनेटमा टोबी आल्डरवेरल्डले उत्कृष्ट गोल गर्दै टोटेनहमलाई पुन अग्रता दिलाए। उनले २५ यार्ड टाढाबाट गरेको प्रहारलाई गोलरक्षक एरेओलाले ठम्याउन सकेनन। ८८औं मिनेटमा ह्यारी केनले पेनाल्टी मार्फत गोल गर्दै जित पक्का गरेका थिए।

प्रि सिजनको पहिलो खेलमा जित हात पारेको पिएसजीले दोश्रो खेलमा हार व्येहोर्यो। यता टोटेनहमले भने जितसँगै आफ्नो नयाँ सिजनको तयारी सुरु गरेको छ।