बेजिङ (एजेन्सी)– चेल्सीका स्टार पेद्रोले अस्पतालबाट समर्थकहरुलाई सन्देश दिदै आफ्नो अवस्था एकदम ठिक रहेको बताएका छन् । शनिबार प्रिमियर लिग प्रतिद्वन्द्वि आर्सनलसँगको मैत्रीपूर्ण खेलमा गोलकिपर डेभिड ओस्पिनासँग ठोक्किएर पेद्रो घाइते भएका थिए ।

पेद्रो गोल गर्ने प्रयासमा अघि बढेको अवस्थामा आर्सनलका गोलकिपर ओस्पिनापनि बल रोक्न अघि बढे । त्यहि बेलामा दुई ठोक्किए । पेद्रोको नाकमा लागेपछि बार्सिलोनाका पूर्व स्टार मैदानमा ढले । पेद्रोको नाककाट रगत बगेपछि उनलाई मैदानबाट बाहिर लगियो र थप उपचारका लागि अस्पताल पुर्याएको थियो ।

समर्थकहरुको चासोलाई ध्यानमा राख्दै पेद्रोले आफ्नो अवस्थाबाट बारेमा सामाजिक सञ्जालमार्फत सन्देश दिएका थिए । अस्पतालबाट फोटो पोस्ट गर्दै पेद्रोले लेखेका छन्,‘घटना दुःखद थियो । तर भाग्यवश सबै ठिक छ । स्वास्थ्य लाभको शुभेच्छाका लागि सबैलाई धन्यवाद ।’

२९ बर्षे खेलाडीको सबै अवस्था ठिक भएपछि उनी कहिलेबाट मैदानमा फर्कन्छन् भन्ने अहिले पक्का भएको छैन । बर्ड नेस्ट रंगशालामा शनिबार भएको खेलमा चेल्सीले आर्सनललाई ३–० ले हराएको थियो । विलियनले गोलको खाता खोलेको खेलमा मिसी बासुआइले दुई गोल गरेका थिए ।