स्पेन (एजेन्सी) – स्पेनिस लिग च्याम्पियन रियल म्याड्रिडका स्टार फरवार्ड क्रिस्टियानो रोनाल्डोले बार्सिलोनाका नेयमारलाई क्लब नछोड्ने सुझाव दिएका छन्। सामाजिक संजाल व्हाट्स्यापमा कुरा गर्दै रोनाल्डोली नेयमारलाई उक्त सल्लाह दिएको स्पेनिश पत्रिका डिअरियोगोलले बताएको छ।

नेयमारलाई पेरिस सेन्ट जर्मेन (पिएसजी)बाट ठुलो रकमको प्रस्ताव आइरहेको बेलामा रोनाल्डोले यस्तो सुझाव दिएका हुन्।  उनले नेयमारले बार्सा छाडेर पिएसजी गएमा निकै ठुलो गल्ति हुने बताएका छन्। नेयमार र रोनाल्डो लामो समयदेखिका राम्रा साथीहरु हुन्। विगतमा दुइ खेलाडीलाई नाईकको विभिन्न कार्यक्रमहरुमा पनि सँगै देख्ने गरिएको थियो।

पिएसजीले नेयमारलाई प्रति साता ५ लाख पाउण्डको प्रस्ताव राखेपछि नेयमार पनि सोच्न बाध्य भएका थिए। यसबाहेक क्लबले नेयमारको १ सय ९६ मिलियन पाउण्डको रिलिज क्लज पनि तिर्ने सहमति गरेको छ। तर रोनाल्डोले भने नेयामर फ्रान्स गएको खण्डमा उनले आफुलाई एक कदम पछाडी धकेल्ने बुझिएको छ।

नेयमार हाल बार्सिलोनाको प्रि सिजनको खेलहरुमा भाग लिन अमेरिकामा छन्। पिएसजी पनि हाल प्रि सिजनको प्रतियोगिता खेल्न अमेरिकामै पुगेको छ। पिएसजी र बार्सिलोनाले यसबारे औपचारिक रुपमा केहि नबोलेपनि प्रारम्भिक चरणका बैठक सम्पन्न भइसकेको बुझिएको छ।