एजेन्सी – चेल्सीका प्रशिक्षक एन्टोनियो कन्टेले टोटेनहम हट्स्परका स्ट्राइकर ह्यारी केनको प्रशंसा गर्दै उनलाई भित्र्याउनु चेल्सीको सपना रहेको बताएका छन्। भर्खरै मात्र ५८ मिलियन पाउण्ड खर्चेर रियल म्याड्रिडबाट अल्भारो मोराटा भित्र्याएको चेल्सीले केनलाई खरिद गर्ने प्रयासनै नगरेको बताए।

पछिल्ला २ सिजनमा प्रिमियर लिगको सर्वाधिक गोलकर्ता रहेका २३ वर्षीय केनले टोटेनहमलाई छुट्टै श्रेणीमा पुर्याएको कन्टेले बताए। ‘टोटेनहमले अहिलेको टोलीलाई सँगै राख्न सक्यो भने निकै राम्रो हुनेछ। मेरो लागि केन अहिले विश्वमा रहेका सर्वोत्कृष्ट फरवार्ड मध्यका एक हुन्। यदि मैले चाहेको हुने भए मेरो लागि केन पहिलो रोजाई हुन्थे।’

‘उनि शारीरिक रुपमा बलिया त छन् नै, उनको बल हुँदा र नहुँदा भिड्ने मनस्थिति र दुवै खुट्टाको शक्तिले मलाई प्रभावित पारेको छ। उनि एक कम्प्लिट खेलाडी हुन्। विश्वकै उत्कृष्टमध्ये पर्ने केनको अहिले सुरुवाती मूल्य सय मिलियन पाउण्ड पर्न आउँछ।’

उनले केनले टोटेनहमको लागि निकै ठुलो भूमिका खेल्दै आएको र क्लबले पनि आफ्नो स्तरलाई उकास्दै लागेको अभिव्यक्ति दिए। जारी प्रि सिजनमा केनले टोटेनहमका लागि दुवै खेलमा १ हाफ खेलेका छन् र पहिलो खेलमा गोल पनि गरेका थिए। केनले आफ्नो भविष्य टोटेनहमबाट बाहिर कतै नरहेको बारम्बार प्रष्ट्याइरहेका छन्।