मिलान (एजेन्सी) – इङ्गलिस प्रिमियर लिग च्याम्पियन चेल्सीका स्ट्राइकर डिएगो कोष्टालाई भित्र्याउन इटालियन क्लब एसी मिलानले प्रक्रिया सुरु गरेको छ। कोष्टाका एजेन्ट जोर्गे मेन्डेसले यसै साता मिलानसँग सम्झौताबारे छलफल गरेका थिए।

गत सिजन प्रशिक्षक कन्टेसँग खटपट परेसँगै यस सिजनको सुरुवात नहुँदै कन्टेले कोष्टालाई चेल्सीमा उनको भविष्य नरहेको बताएका थिए। गत सिजन चेल्सीलाई उपाधि जिताउँदा महत्त्वपूर्ण भूमिका खेल्दै सर्वाधिक गोलकर्ता बनेका कोष्टा अहिले नयाँ क्लबको खोजीमा छन्। मिलानले यस सिजन ट्रान्सफर विन्डोमा निकै खर्च गरेर टोलीलाई नयाँ रुप दिने प्रयास गरेको छ। त्यसै योजना अनुरुप कोष्टालाई मिलानमा ल्याउने प्रक्रिया सुरु भएको बुझिएको छ।

कोष्टा आफैंले एटलेटिको म्याड्रिड फर्कने सोच राखेपनि म्याड्रिडको क्लब हाल ट्रान्सफर प्रतिबन्धमा रहेकाले उक्त स्थानान्तरण सफल हुन सकेको छैन। पछिल्लो साता कोष्टाले सार्वजनिक गरेको इन्स्टाग्राम भिडियोमा उनले एटलेटिको म्याड्रिडको जर्सीमा लगाउँदै मिडफिल्डर सेस फाब्रिगासलाई ‘कन्टेलाई अंकमाल गर्न’ सुझाव दिएका थिए।

चेल्सीले कोष्टालाई क्लब छाड्न स्वीकृति दिएसँगै धेरै क्लबले उनलाई भित्र्याउने प्रयास गरेका छन्। टर्किस क्लब बेसिक्टासले भने कोष्टालाई जनवरीसम्म मात्र भएपनि उक्त क्लबबाट खेल्ने प्रस्ताब राखेको थियो। तर कोष्टाले उक्त प्रस्ताबलाई आफैं नकारेका थिए।

पछिल्लो सिजन चेल्सीबाट ४२ खेल खेलेका कोष्टाले २२ गोल गर्दै ७ असिस्ट दिएका थिए। २८ वर्षीय फरवार्डले जनवरीसम्म कुनै क्लबमा नखेल्ने र त्यसपछि एटलेटिको जाने सोच बनाएको पनि बुझिएको छ। चेल्सीले कोष्टाको स्थानमा स्पेनकै अर्का स्ट्राइकर अल्भारो मोराटालाई भित्र्याईसकेको छ।