सिंगापुर (एजेन्सी)– नयाँ स्ट्राइकर अल्भारो मोराटाले चेल्सीमा सफलताका लागि प्रदर्शनमा सुधार गर्नुपर्ने प्रशिक्षक एन्टोनियो कोन्टेले बताएका छन् । सिंगापुरमा शनिबार इन्टर मिलानसँग २–१ ले हारेको खेलमा मोराटाले कमजोर प्रदर्शन गरेपछि कोन्टेको यस्तो भनाई सार्वजनिक भएको हो ।

रियल म्याड्रिडका पूर्व खेलाडीले बायर्न म्युनिखसँगको ‘डेब्यू’ खेलमा उच्च प्रदर्शन गरेका थिए । यद्दपी त्यो खेल पनि चेल्सीले गुमाएको थियो । प्रि सिजनमा बायर्न र इन्टरसँग गरि लगातार दुई खेल गुमाउँदै चेल्सी फर्कदैछ ।

इन्टरसँगको खेलपछि कोन्टेले भने,‘मोराटाले हामीसँग प्रशिक्षण सुरु गरिसकेका छन् । हाम्रो फुटबलको शैलीसँग चाँडो घुलमिल हुन उनले आफ्नो शारीरिक अवस्थामा सुधार ल्याउन जरुरी छ ।’

मोराटाले राम्रो प्रदर्शनका लागि प्रयास गरेको जनाउँदै कोन्टले थपे,‘उनी मेहनत गरिरहेका छन् । उनले इन्टरसँगको खेलमा पनि जति सक्दो राम्रो गर्ने प्रयास गरेका हुन् । तर पनि उनले अझै सुधार गर्नुपर्ने आवश्यकता छ ।’

इन्टरसँग मोराटालाई बायाँ विङ्सबाट खेलाइएको थियो, जुन उनको स्वभाविक ठाँउ भने होइन । प्रिमियर लिग च्याम्पियन टोलीबाट पहिलो रोजाई पर्नका लागि स्पेनिस मोराटाले सुधार गर्नेपर्नेमा कोन्टेले जोड दिएका छन् ।

बेल्जियमका मिची बाट्सुयीले प्रि सिजनमा उच्च प्रदर्शन गरेका छन् । यहि समरमा क्लब छोड्ने तरखरमा रहेको डिएगो कोस्टाको ठाँउ लिनका लागि मोराटाले फर्ममा जतिसक्दो छिटो फर्कन आवश्यक रहेको बताइएको छ ।

रियलमा दुईवटा च्याम्पियन्स लिग उपाधि जितेका मोराटा झन्डै ६० मिलियन युरोमा चेल्सी पुगेका थिए । चेल्सीले प्रिमियर लिग र च्याम्पियन्स लिग उपाधिमा बलियो चुनौति पेश गर्न मोराटा भित्राएको हो ।