सिकागो (एजेन्सी) – प्रि-सिजनको तयारीमा रहेको रियल म्याड्रिडले नेपाली समयानुसार बिहिबार बिहान हुने खेलमा मेजर लिग सकर (एमएलएस)को अल स्टार टोलीसँग भिड्दैछ। प्रत्यक युरोपियन सिजनको सुरुवातअघि हुँदै आएको खेलमा गत सिजन आर्सनलले एमएलएसलाई २-१ले पराजित गरेको थियो।

एमएलएस अल स्टारको टोलीमा युरोपियन अनुभव बोकेका खेलाडी पनि रहेका छन्। रियल म्याड्रिडबाट व्यवसयिक फुटबल खेलिसकेका ब्राजिलियन मिडफिल्डर काकासँगै बार्सिलोनाबाट लामो समय खेलेका स्पेनिस स्ट्राइकर डेभिड भिल्ला अल स्टारको जर्सीमा देखिनेछन्। यसबाहेक जर्मनीबाट लामो समय खेलेका मिडफिल्डर बास्टियान स्वाइनस्टाइगर, इटालीका सबास्टीयान जिओभिन्को, मेक्सिकोका जिओभानी दस सान्टोस र अमेरिकी राष्ट्रिय टोलीका टिम हवार्ड, जोजी अल्टिडोर, माइकल ब्राडली, लगायतका खेलाडीको उपस्थिति रहनेछ।

यता रियल म्याड्रिडबाट पोर्चुगिज फरवार्ड क्रिस्टियानो रोनाल्डो बाहेकका सम्पूर्ण खेलाडीहरुले उपस्थिति जनाउनेछन्। प्रशिक्षक जिनेदिन जिदानले यस खेललाई आगामी साता हुने युइएफा सुपर कपको तयारीको रुपमा लिएको र आफ्नो पहिलो रोजाईका खेलाडीलाई मैदानमा उतार्ने बुझिएको छ। रियलले प्रि सिजनका अघिल्ला खेलहरुमा जित हात पर्न नसकेको हुनाले यसमा जित दर्ता गरेर उच्च मनोबलका साथ युरोप फर्कने धुनमा हुनेछ।

रियल अल स्टारको खेलमा सहभागिता जनाउने पहिलो स्पेनिस टोली पनि हो। यसअघी यस प्रतियोगितामा इङ्गल्याण्डका टोलीहरुको बाहुल्यता रहेको थियो भने जर्मनीको बायर्न म्युनिख, इटालीको एएस रोमा र स्कटल्याण्डको सेल्टिकले पनि खेलिसकेका छन्।