स्पेन (एजेन्सी) – बार्सिलोनाले फरवार्ड नेयमार पिएसजी जाने पक्का भएसँगै उनको स्थानमा एटलेटिको म्याड्रिडका एन्टोइन ग्रिज्मनलाई विकल्पको रुपमा हेरेको छ। ग्रिज्मनले एटलेटिकोसँग भर्खरै मात्र नयाँ सम्झौता गरेको भएपनि बार्सिलोनाले ठुलो रकमको प्रस्ताव राखेर उनलाई भित्र्याउन खोजेको हो।

ट्रान्सफर विन्डोको सुरुतिर म्यानचेस्टर युनाइटेडजाने हल्ला चलेपनि एटलेटिकोले ट्रान्सफर विन्डोमा खेलाडी ल्याउन प्रतिबन्ध भएपछि युनाइटेडको प्रस्ताव अस्विकार गरेको थियो। युनाइटेडले ग्रिज्मनका लागि ६० मिलियन पाउण्डको प्रस्ताव राखेको बुझिएको छ। तर, बार्सिलोनाले भने ग्रिज्मनलाई भित्र्याउन कम्तिमा पनि त्यसको दोब्बर रकम तिर्नुपर्ने हुन्छ। ग्रिज्मनले भर्खरै मात्र नयाँ सम्झौता गरेको र एकै लिगको क्लबमा खेलाडी बेच्दा असर पर्ने हुनाले बार्सालाई महँगो रकम तिर्नुपर्ने बाध्यता छ।

केहि समयअघि लिओनेल मेस्सीले नेयमारले बार्सिलोना छाडेको खण्डमा ३ खेलाडीले उनको स्थान लिन सक्ने बताएका थिए। त्यसमा ग्रिज्मनको नाम भने रहेको थिएन। मेस्सीले युभेन्टसका युवा फरवार्ड पाउलो डीबाला, बोरुसिया डर्टमुण्डका ओस्मान डेम्बेले र लिभरपुलका फिलिप कौटिन्होलाई नेयमारको उत्तराधिकारीका रुपमा हेरेका थिए।

बार्सिलोनाले लिभरपुलका मिडफिल्डर कौटिन्होलाई २ पटक प्रस्ताव गरिसकेको छ भने लिभरपुलले दुवैपटक उक्त खेलाडीले क्लब नछाड्ने बताएको छ। बार्सिलोनाले अन्तिम प्रयास स्वरुप ठुलो रकमको प्रस्ताव राख्ने तयारी गर्दैछ।