लन्डन (एजेन्सी)– इडेन हाजार्ड बार्सिलोना गएको खण्डमा प्रिमियर लिग च्याम्पियन चेल्सीले मोनाकोका स्टार केलियन बाप्पेलाई लिने प्रयास गर्ने भएको छ । १८ वर्षे बाप्पे अहिले युरोपमा सर्वाधिक चासोका स्ट्राइकर मध्येका हुन् । उनले गत सिजन फ्रेन्च च्याम्पियन मोनाकोबाट उच्च प्रदर्शन गरेका थिए ।

बार्सिलोनाको चिर प्रतिद्वन्द्वि रियल मड्रिडसँगै म्यानचेस्टर सिटीले पनि बाप्पेमाथि चासो देखाइरहेका छन् । स्पेनिस टिभि डोन बालोनले पनि बार्सिलोनाले नेयमारको ठाँउमा हाजार्ड ल्याउन चाहेको उल्लेख गरेका छ । नेयमार छिट्टै पेरिस सेन्ट जर्मेनमा आबद्ध हुने विश्वास गरिएको छ । सोही रिपोर्टमा बार्सिलोनाले हाजार्डलाई भित्राउन चर्को रकम खर्च गर्न पनि तयार रहेको बताइएको छ । रियलले भने पछिल्लो दुई सिजन देखि हाजार्डमाथि आँखा लगाइरहेको छ ।

मोनाकोबाट बाप्पे ल्याउनका लागि लाग्ने रकम तिर्न मद्दत पुग्ने देखिएमा मात्र चेल्सीका रसियन मालिक रोमन अब्रामोभिच हाजार्ड बेच्न तयार हुन सक्छन्। मोनाकोले बाप्पेका लागि १ सय ७८ मिलियन पाउन्ड माग गरेको छ । जुन रकम अहिलेको विश्व कीर्तिमान रकम भन्दा दोब्बर हो । गत सिजन म्यानचेस्टर युनाइटेडले पाउल पोग्बाको लागि विश्व कीर्तिमानी ८९ मिलियन पाउन्ड खर्चेको थियो।

यद्दपी बार्सिलोनाले हाजार्डसँगै लिभरपुलका फिलिपे कौटिन्हो, एटलेटिको म्याड्रिडका एन्टोइन ग्रिज्मन लगायतका खेलाडीमा पनि आफ्नो नजर राखेको छ। बार्सा आफैंले भने बाप्पेलाई ल्याउने चासो देखाएको छैन।