सिकागो (एजेन्सी) – प्रि-सिजन तयारीमा अमेरिका रहेको स्पेनिस च्याम्पियन रियल म्याड्रिडले आफ्नो प्रि-सिजनको पहिलो खेल जितेको छ। अमेरिकाको व्यवसायिक लिग मेजर लिग सकरको अल स्टार टोलीविरुद्ध भएको खेलमा रियल पेनाल्टी सुटआउटमा ४-२ले विजयी भएको हो।

नियमित समयको खेल १-१मा टुंगिएपछि खेलको नतिजा पेनाल्टी सुटआउटबाट लिइएको थियो। युवा खेलाडी बोर्जा मायोरालले ५९औं मिनेटमा गोल गर्दै रियललाई अग्रता दिलाएका थिए। मायरालले रियलका नयाँ खेलाडी ड्यानी सेबालोसको पासमा गोल गरेका थिए। तर, ८७औं मिनेटमा डोमिनिक डयरले गोल गरेपछि खेल बराबरीमा आइपुगेको थियो।

पेनाल्टी सुटआउटमा रियलका लागि करीम बेन्जेमा, ग्यारेथ बेल, माटियो कोभाचिच र मार्सेलोले गोल गरेका थिए। यता एमएलएसका अल्मिरोन र भालेरीले गोल गर्दा जिओभानी डस स्यान्टोस चुकेका थिए।

रियलले यसअघी खेलेका प्रि-सिजनका सबै खेलहरुमा पराजय भोगेको थियो। अर्को साता रियलले युइएफा सुपर कप अन्तर्गत म्यानचेस्टर युनाइटेडको सामना गर्दैछ। त्यसपछि घरेलु सिजनको सुरुवातमा एल क्लासिको हुनेछ। सुपर कपको छिनोफानो गर्न रियलले बार्सिलोनासँग होम र अवे गरेर २ पटक खेल्नेछ।

क्रिस्टियानो रोनाल्डोबिना मैदानमा उत्रिएको रियलले अर्को साताबाट भने उनको साथ् पाउने अपेक्षा गरिएको छ। रोनाल्डो कन्फेडेरेसन कपमा सहभगिता जनाएका र जुम्ल्याहा सन्तानका पिता बनेका कारण ढिला प्रशिक्षणमा सामेल हुने भएका हुन्। उनले आफ्नो पुरानो क्लब म्यानचेस्टर युनाइटेडविरुद्ध उत्रने सम्भावना रहेको छ।