स्पेन (एजेन्सी) – स्पेनको दोश्रो श्रेणीमा खेल्ने क्लब जिम्नास्टिकसँगको मैत्रीपूर्ण खेलमा बार्सिलोनाले १-१को बराबरी खेलेको छ। खेलमा पछाडी परेको बार्सिलोनालाई फरवार्ड पाको अल्कासेरको गोलको मद्दतले बराबरीमा ल्याएको थियो।

प्रिसिजनका अघिल्ला ३ खेलमा युभेन्टस, म्यानचेस्टर युनाइटेड र रियल म्याड्रिडलाई पराजित गरेको बार्सिलोनाले यस खेलमा आफ्नो स्टार खेलाडीहरुलाई विश्राम दिएको थियो। नेयमार पिएसजी गएपछिको पहिलो खेलमा बार्सिलोना ११औं मिनेटमा पछाडी पर्यो। आयोजक टोली जिम्नास्टिकका लागि मानु बरेइरोले गोल गरेका थिए। बार्सिलोनाका लागि भने फरवार्ड पाको अल्कासेरले ७९औं मिनेटमा फ्रिकिक मार्फत उत्कृष्ट गोल गर्दै खेललाई बराबरीमा ल्याएका थिए।

लामो समयपछि टोलीमा परेका डिफेन्डर थोमस भर्मालेन खेलको सुरुवातमाइ घाइते भएपछि उनको स्थानमा मार्लोन सान्टोस आएका थिए। जर्मनीका गोलरक्षक मार्क आन्दर टेर स्टेगनपनि दोश्रो हाफमा मैदान प्रवेश गरेका थिए। बार्सिलोनाका लागि आन्द्रेस इनिएस्टा, लिओनेल मेस्सी, जेरार्ड पिके र लुइस सुआरेज बाहेक सबै खेलाडी मैदानमा उत्रिएका थिए।

बार्सिलोनाले अर्को साता ब्राजिलियन टोली चापेकोएन्सीसँग खेल्ने कार्यक्रम रहेको छ। त्यसपछि स्पेनिस सुपर कपमा रियल म्याड्रिडको सामना गर्ने बार्साले नेयमारको स्थानमा को खेलाडी ल्याउने भन्ने निश्चित भइसकेको छैन।