म्यानचेस्टर (एजेन्सी)– इङ्गलिस प्रिमियर लिग सिजन अर्को साता सुरु हुँदैछ। तर, प्रिमियर लिग टोली म्यानचेस्टर युनाइटेडका लागि भने मंगलबारबाटै सिजनको सुरुवात हुँदैछ। युनाइटेडले म्यासेडोनियामा मंगलबार हुने युइएफए सुपर कपमा रियल म्याड्रिडको सामना गर्दैछ ।

जिनेदिन जिदानको प्रशिक्षकत्वमा रहेको रियलको सामना गर्न जोसे माउरिन्होको टोली सोमबार त्यसतर्फ लागेको छ। हरेक बर्ष जस्तै युरोपा लिग र च्याम्पियन्स लिग विजेताबीच सुपर कप हुने गर्दछ। यी दुई टोलीले ३३ हजार ४ सय ६० जना दर्शक क्षमताको फिलिप एरिनामा एक-अर्कोको सामना गर्नेछन्।

युनाइटेडका नयाँ खेलाडी नेमान्जा म्यटिचले बुधबार साम्पडोरियासँग २–१ को जितमा प्रभावशाली प्रदर्शन गरेकाले उनले रियलविरुद्ध खेल्ने सम्भावना छ। अर्कोतिर यो सिजन क्लबमा आबद्ध भएका भिक्टर लिन्डेलोफ र रोमेलु लुकाकुले पनि प्रतिस्पर्धात्मक खेलमा ‘डेब्यू’ गर्ने सम्भावना छ।

युनाइटेडका रक्षकद्वय एरिक बेली र फिल जोन्स प्रतिबन्धमा छन्। बेलीले सोमबार म्यासेडोनिया उड्नुअघि एन्टोनियो भ्यालेन्सिया, पाउल पोग्बा र एन्थोनी मार्सियलसँगको खिचिएको हवाइजहाज भित्रको सेल्फि इन्स्टाग्राममा पोस्ट गर्दै लेखेका थिए,‘म्यासेडोनिया हामी आउँदैछौं ।’

युनाइटेडका प्रशिक्षक माउरिन्होले आफ्नो क्लबको प्रि-सिजन उत्कृष्ट रहेको बताएका छन्। ‘सबैले खेले। हामीले धेरै परिक्षण गर्यौं। यद्दपी नतिजाको हामीले धेरै मतलब गरेनौं,’ उनले भने,‘हामीले टोलीमा आउने आमुल परिवर्तनका विषयमा परिक्षण गरेका हौं। केही चोटले समस्या पारेको छ, तर त्यस्तो चिन्ताजनक छैन। अब हाम्रो ध्यान सुपर कप र प्रिमियर लिगको पहिलो खेलमा लक्षित छ।’

केही साताअघि युनाइटेड र रियलबीच अमेरिकामा मैत्रीपूर्ण खेल भएको थियो। जहाँ युनाइटेड पेनाल्टी सुटआउटमा २-१ले विजयी भएको थियो।