बार्सिलोना (एजेन्सी) – स्पेनिस क्लब बार्सिलोनाले ब्राजिलियन टोली चापेकोएन्सीलाई ५-०ले पराजित गरेको छ। जोआन ग्याम्पर ट्रफी अन्तर्गत आइतबार भएको खेलमा बार्सिलोनाले खेलको सुरुवातबाटै पकड जमाएको थियो।

जेरार्ड डेउलेफेउले खेलको छैटौं मिनेटमा टोलीलाई अग्रता दिलाएका थिए। उनले इभान राकीटिचले बक्सभित्र उत्कृष्ट मुभ बनाएपछि खाली पोष्टमा गोल गरेका थिए। त्यसको ५ मिनेट नबित्दै बार्सिलोनाले अग्रता दोब्बर पर्यो। सर्जियो बुस्केट्सले करिब २५ यार्ड टाढाबाट प्रहर गरेको सट टप कर्नरमा छिरेपछि बार्सिलोना २-०ले अगाडी बढ्यो। लिओनेल मेस्सीले खेलको २८औं मिनेटमा बार्सिलोनालाई ३-०ले अगाडी बढाए।

बार्सिलोनाले दोश्रो हाफमा २ गोल थप्यो। लुइस सुआरेजले ५५औं मिनेटमा गोल गरे भने वैकल्पिक खेलाडी डेनिस सुआरेजले ७४औं मिनेटमा टोलीको अन्तिम गोल गरे। प्रतियोगिताको ५२औं संस्करण जित्दै बार्सिलोनाले ४०औं पटक उपाधि घरेलु मैदानमै राख्न सफल रह्यो।

गत नोभेम्बरमा कोलोम्बियामा भएको विमान दुर्घटनामा परेर ७१ जनाको निधन हुँदा त्यस प्लेनमा अधिकांश मान्छे चापेकोएन्सी क्लबसँग सम्बन्धित रहेका थिए। बार्सिलोनाले उक्त दुर्घटनामा परेका खेलाडीको सम्मानमा चापेकोएन्सीलाई यस खेलमा सहभागिता जनाउन आग्रह गरेको थियो।

बार्सिलोनाले गत डिसेम्बरमा क्लबलाई यस खेलमा सहभागी हुन् आग्रह गरेपछि ब्राजिलियन क्लबले उक्त प्रस्ताव स्वीकारेको थियो। चापेकोएन्सी यस खेलमा सहभागी हुने छैटौं ब्राजिलियन टोली हो। यसअघि सहभागी मध्ये ब्राजिलियन टोली इन्टरनासिओनालले मात्र उपाधि जित्न सकेको छ।

चापेकोएन्सीबाट उक्त प्लेन दुर्घटनामा परेर ज्यान बचाउन सफल रहेका ३ मध्य एलेन रुसलले खेलमा सहभागिता जनाए। टोलीको कप्तानी गरेका उनले ३६ मिनेट मैदानमा बिताएका थिए। अर्का खेलाडी नेटोले र गोलरक्षक फोल्म्यानले भने खेलको सुरुवातमा खेलको औपचारिक किक-अफ गरेका थिए। अहिले उपचार गर्दै गरेका नेटो मैदानमा फर्कने सम्भावना रहेको छ भने गोलरक्षक फोलम्यानको खुट्टा काटिएको छ।