पेरिस (एजेन्सी) – विश्व कीर्तिमानी रकममा फ्रान्सेली क्लब पेरिस सेन्ट जर्मेन (पिएसजी) पुगेका ब्राजिलियन फरवार्ड नेयमारले आफ्नो नयाँ क्लबमा डेब्यु गर्न अझै केहि समय कुर्नुपर्ने देखिएको छ। स्पेनिस लिगले आवश्यक कागजात फ्रेन्च लिगलाई नपठाउँदा यस्तो समस्या आइपरेको हो।
नेयमार पिएसजी आइपुगेको १ साता बितिसक्दा पनि स्पेनिस लिगले अझैपन्मी उनको अन्तर्राष्ट्रिय स्थानान्तरण प्रमाणपत्र (आइटिसी) उपलब्ध गराएको छैन। फ्रेन्च लिगले उक्त प्रमाण पत्र प्रप्त नगर्दासम्म नेयमारले पिएसजीबाट खेल्न पाउने छैनन्। सामान्यतया ट्रान्सफर पुरा भएको २/३ दिन भित्रै उपलब्ध गराइने प्रमाण पत्र स्पेनिस लिगले जानाजान नपठाएको भन्ने आरोप समर्थकहरुको छ।
नेयमारको ट्रान्सफर हुँदा पनि ला लिगाको अध्यक्षले उक्त रिलिक क्लजको छेक बुझ्न मानेका थिएनन्। अध्यक्ष जाभिएर टेबासले नेयमारका वकिलहरुले दिएको चेक लिन मानेका थिएनन्। स्पेनिस लिगले नेयमारको प्रस्थानपछि स्पेनको लिग फुटबलको लोकप्रियता केहि घट्ने डरले उनको ट्रान्सफर रोक्ने प्रयास गरेका थिए। तर फ्रेन्च लिगले छोटो समयमै प्रेस वक्तव्य जारी गरेपछि ट्रान्सफर भएको थियो।
पिएसजीको पहिलो लिग खेलमा दर्शकदिर्घामा रहेका नेयमारले दोश्रो खेल खेल्नका लागि बिहिबारसम्म उक्त कागजात फ्रेन्च लिगले पाउनुपर्ने प्रावधान रहेको छ। स्पेनिस लिगले भने केहि ढिलाई हुनु सामान्य रहेको बताउँदै आएको छ। यदि स्पेनिस लिगले जानाजान यसो गरेमा पिएसजी र फ्रेन्च लिगले फिफामा उजुरी पनि हाल्न सक्नेछन्।
पिएसजीले लिग वनको दोश्रो खेलमा आइतबार ग्वेनग्याम्पको सामना गर्दैछ। उक्त खेलमा सहभागी भए नेयमारले फ्रान्सेली क्लबका लागि पहिलो खेल खेल्नेछन्। खेल ग्वेनग्याम्पको घरेलु मैदानमा हुनेछ।
