काठमाडौँ (हाम्रो खेलकुद) – सातदोबाटोस्थित एन्फा कम्प्लेक्सको कृत्रिम घाँसे मैदानमा यहि शुक्रबारदेखि साफ यू१५ च्याम्पियनसिप सुरु हुँदैछ। दक्षिण एसियाका ६ टोली सहभागी रहने प्रतियोगितामा २ समूह विभाजन गरेर लिग कम नकआउट पद्दतिमा खेलाइनेछ।
आयोजक नेपालसँगै समूह ‘बी’मा भारत र माल्दिभ्स रहेका छन् भने समूह ‘ए’मा भुटान, बंगलादेश र श्रीलंका रहेका छन्। पछिल्लो पटक साफ यू१६ हुने गरेकोमा यसपटक भने एएफसी यू१६ प्रतियोगिताको तयारीका लागि साफ्ले यू१५ उमेर समूहलाई विशेष प्राथमिकतामा राखेको हो। प्रतियोगिताको एक सेमीफाइनल र तेश्रो स्थानको खेल बाहेक सम्पूर्ण खेल एन्फा कम्प्लेक्समा खेलिनेछ। एक सेमिफाइनल र तेश्रो स्थानको खेल भने एपीएफको हल्चोक स्थित रंगशालामा खेलिनेछ।
प्रतियोगितामा आवश्यक पर्ने सम्पूर्ण अफिसियलहरु नेपाल आइपुगिसकेका छन्। प्रतियोगितामा खेल खेलाउने ८ रेफ्रीमध्य २ रेफ्री नेपालका रहेका छन्। नेपालबाट रेफ्री कबिन व्यन्जनकार र नानिराम थापाले प्रतियोगिताको खेल खेलाउनेछन्। सहभागी सबै टोलीका खेलाडीहरु बुधबार आउने कार्यक्रम रहेको छ।
प्रतियोगिताको सम्पूर्ण बसोबास र सवारीको खर्च साफले व्येहोर्ने छ। यसैगरी एन्फाले प्रतियोगिताको व्यवस्थापन सम्हाल्ने जिम्मा लिएको छ। एन्फाले यसअघिनै टिकटको सम्पूर्ण जिम्मा इसेवालाई सुम्पेको थियो। यस प्रतियोगिताको टिकट मूल्य साधारण प्यारापीट तर्फ रु २०० र भिआइपी तर्फ रु ५०० रहेको छ।
खेलको प्रत्यक्ष प्रसारण एपी वन टेलिभिजनले गर्नेछ।
