म्याड्रिड (एजेन्सी)– रियल म्याड्रिडले स्पेनिस ला लिगामा रियल बेटिसलाई सान्टियागो बेर्नाबेउमा निम्त्याउँदैछ । लगातार दुई खेलको बराबरीपछि यहि साता भने रियलले विजय लय भेट्टाएको थियो । यद्दपी त्यो आइतबारको जितमा करिम बेन्जेमा, टोनी क्रुस, क्रिस्टियानो रानाल्डो विनानै टोली उत्रिएको थियो । त्यसका वावजुद टोली तीन अंक जोड्न सफल भएको थियो ।

पछिल्लो सफलताका नायक थियो हर्नान्डेजको काँधमा चोट लागेपछि उनी कम्तीमा केही साताका लागि मैदान बाहिर हुने भएका छन् । यो खेलमार्फत मार्सेलो मैदान फर्कदैछन् । उनी पछिल्लो खेलमा प्रतिबन्धमा थिए । चोटमुक्त भएका क्रुस पनि आजको खेलको पहिलो रोजाइमा पर्ने सम्भावना छ । बेन्जेमा र काभाकिक भने अझै केही दिनपछि मात्र खेलमा फर्कने सम्भावना छ ।

तर, सबैको नजर भने क्रिस्टियानो रोनाल्डोको पुनरागमनमा हुनेछ । स्पेनिस सुपर कपको पहिलो लेगमा रेफ्रीलाई धक्का दिएका कारण उनले घरेलु फुटबलका पाँच खेल प्रतिबन्धमा बिताउनु परेको थियो । उनको अनुपस्थितिमा साविक विजेता रियलको सुरुआत राम्रो हुन सकेन ।

टोलीले चार खेलमा ८ अंक मात्र जोड्दा चिर प्रतिद्वन्द्वि बार्सिलोनाले सबै ५ खेल जित्दै १५ अंक जोडिसकेको छ । अर्को तिर रोनाल्डोको बार्सिलोनाका स्टार लियोन मेस्सीसँग सिजनको अन्त्यमा निर्णय हुने गोल्डेन बुटका लागि पनि व्यक्तिगत प्रतिस्पर्धा हुन्छ नै । घरलु फुटबलमा प्रतिबन्धमा भएपनि गत साता च्याम्पियन्स लिगअन्तर्गत समूह चरणको खेलमा रोनाल्डो राम्रो लयमा देखिएका थिए । रियल र बेटिसको खेल नेपाली समय अनुसार आज राती १ः४५ बजे सुरु हुनेछ ।