विविध सुवेदी / दिपेन्द्र पोखरेल
काठमाडौं – एएफसी यु-१६ च्याम्पियन्सिप अन्तर्गत भारत र इराक विरुद्धको खेलमा गोलरहित बराबरीमा टुङ्गिएको छ । नेपालको छनोट हुने सम्भावना भने यस नतिजासँगै समाप्त भएको छ । इराक ७ अंक सहित समूह विजेता बनेको छ भने भारतको ५ अंकसहित समूहको उपविजेता हुँदै छनोट हुने आशा जीवित रहेको छ । भारतको छनोटको सम्भावना अब अरु समूहहरुको नतिजामा निर्भर हुने छ ।
समूह विजेताका रुपमा स्वत: छनोट हुनका लागि भारतका लागि यो जित्नै पर्ने दबाब थियो । त्यसैले खेलमा आक्रमक सुरुवात गरेको भारतका बिकि ओरामले छैठौँ मिनेटमा वान-अन-वान अवसर गुमाएका थिए । त्यस्तै इराकका तर्फबाट हसन सलमान शननको २५ औँ मिनेटको बलियो प्रहार र मुर्ताधा अहमेद अल-फुराजीले २८ औँ मिनेटमा बक्स भित्रबाट गरेको प्रहार भारतका गोलकिपर लालबियक्लुवा जोङ्तेले राम्रो बचाऊ गरे ।
दोस्रो हाफमा भने इराकले बलियो सुरुवात गरेपनि पहिलो राम्रो अवसर भने भारतले पाएको थियो । फ्रिकिकबाट मोइराइङ्गथेम थोइबा सिहंको हेडरलाई इराकी गोलकिपर मोहम्मद हसन अल-हमादानीले सजिलैले बचाऊ गरेका थिए । ७२ औँ मिनेटमा इराकले राम्रो अवसर खेर फालेको थियो । ६ यार्डभित्रबाट सजिद अब्बास अल-लामीले गरेको प्रहार पोस्टभन्दा धेरैमाथि गएको थियो ।
खेलको अन्तिम समयतिर दुवै टोलीले राम्रो अवसर सिर्जना गरे पनि तिनको सदुपयोग भने गर्न सकेका थिएनन् । ९० औँ मिनेटमा मोहम्मद लुए मान्डालावीले बललाई पोस्टको दिशा दिए पनि सलमान शनन अफ-साइड भएका कारण सो गोल स्विकार्य भएन ।
इराकले आफ्नो पहिलो खेलमा नेपाललाई १-० ले हराएको थियो र दोस्रो खेलमा प्यालेस्टाइनसँग ४-० ले विजयी रहेको थियो । त्यस्तै पहिलो खेलमा प्यालेस्टाइनलाई ३-०ले हराएको भारतले दोस्रो खेलमा नेपालसँग २-२ को बराबरी खेलेको थियो । समूहको अन्तिम खेलमा नेपाल प्यालेस्टाइनसँग ३.३० बजे भिड्दै छ ।
