काठमाडौं (हाम्रो खेलकुद)– राष्ट्रिय फुटबल टोलीका गोलकिपर किरण चेम्जोङ दशैका लागि भोली स्वदेश आइपुग्दैछन् । माल्दिभ्समा टिसी स्पोर्टसबाट व्यावसायिक खेल खेलिरहेका उनी आज साँझ त्यहाँबाट उड्नेछन् । उनी गत महिना एसियन कप छनोटअन्तर्गत ताजकिस्तानसँग खेले लगत्तै उनी माल्दिभ्स फर्केका थिए ।

भदौ २० गते ताजकिस्तानसँगको खेल नेपालले २–१ ले गुमाएको थियो । यहाँबाट निराश भएर माल्दिभ्स पुगेका किरणको टोलीले त्यसयता धिवेही प्रिमियर लिग (डिपिएल) मा लगातार तीन खेल जितेको थियो । ग्रिन एफसीलाई ३–१ ले हराएको किरणको टोलीले त्यसअघि माजियलाई १–० ले र मालहोसलाई ३–२ ले हराएको थियो ।

मालहोससँगको खेल चलिरहँदा भदौ २६ गते नेपालमा किरण पल्सर स्पोर्टस अवार्डमा वर्षका उत्कृष्ट खेलाडी पुरुष घोषित भएका थिए । त्यसको केही दिनअघि किरणसहित ८ जनालाई युवा तथा खेलकुद मन्त्रालयले राष्ट्रिय प्रतिभा पुरस्कारबाट सम्मानित गरेको थियो ।

दशै विदामा किरण झन्डै दुई साता स्वदेश बस्नेछन् । उनी असोज २६ माल्दिभ्स फर्कनेछन् । डिपिएलमा उनको टोलीले असोज २८ गते खेल्ने किरणले बताएका छन् । टिसी स्पोर्टस गोलअन्तरमा पछि पार्दै अंक तालिकाको तेस्रो स्थानमा रहेको छ । दोस्रो स्थानको माजिया र टिसी स्पोर्टसको समान १६ अंक छ भने शीर्षस्थानको टोलीको १८ अंक छ ।