काठमाडौं (हाम्रो खेलकुद) – नेपालले साफ यू १८ फुटबल च्याम्पियनसिपको उपाधि जितेको छ । भुटानमा जारी प्रतियोगिताको अन्तिम दिन आज दुवै खेल आफु अनकुल आएपछि नेपालले उपाधि रक्षा गरेको हो । दुई बर्षअघि नेपालले घरेलु मैदानमा आयोजित पहिलो साफ यू १९ को उपाधि जितेको थियो ।

राउन्ड रोविनको अन्तिम खेलमा आज भारतलाई २–० ले हराएपछि नेपाल विजेता बनेको हो । त्यसअघि बंगलादेशले नेपालका लागि उपाधि जित्ने बाटो तयार पारिदिएको थियो । नेपाल र भारतको खेलअघि बंगलादेशले भुटानलाई २–० ले हराएपछि नेपालको उपाधि जित्ने सम्भावना बनेको थियो ।

यदि त्यो खेल भुटानले जित्यो भने अन्तिम खेलअघि नै नेपाल उपाधि दौडबाट बाहिरिसक्ने थियो । सहभागी पाँच टोलीमा राउन्ड रोविनपछि सर्वाधिक अंक प्राप्त गर्ने टोली विजेता भएको हो । नेपाल र बंगालदेशको बराबरी ९ अंक भएपछि हेड टु हेडका आधारमा नेपाल विजेता चुनिएको हो । पहिलो खेलमा भुटानसँग पराजित नेपालले बाँकी सबै टोलीलाई हराएको थियो । नेपालसँग हारेको बंगलादेशले बाँकी टोलीलाई हराएको थियो ।  हेड टु हेडका आधारमा बंगलादेशलाई हराएका कारण नेपाल च्याम्पियन बनेको हो ।

भारतलाई हराउन दुवै गोल दिनेश हेन्जनले गरेका थिए । फ्रिकिकमा आएको बललाई वन टचमा दिनेशले खेल सुरु भएको पहिलो मिनेटमा गोल गरे । उनले नै ३७ औं मिनेटमा पेनाल्टी बक्स भित्रबाट राम्रो गोल गर्दै अग्रता दोब्बर गरेका थिए । दिनेशले ६ यार्ड बक्सको दाँया तर्फबाट फार पोस्टमा भारतीय गोलकिपरलाई बिट गर्दै गोल गरेका थिए ।