सबिन शेर्मा
झापा – चर्च ब्वाइज क्लब काठमाडौंले टुर्बोग दुधे गोल्ड कप फुटबल प्रतियोगिताको उपाधि जितेको छ । आज भएको फाइनलमा एपिएफलाई सडन डेथ ८–७ ले हराउँदै चर्च ब्वाइज च्याम्पियन बनेको हो । निर्धारित समयमा २–२ को बराबरीपछि को टाइब्रेकरमा पनि ४–४ को बराबरी भएपछि खेल सडन डेथमा गएको थियो ।

निर्धारित ८० मिनेटको खेलको पहिलो हाफमा एपिएफले लिएको २–० को अग्रतालाई जोगाउन नसकेपछि अन्तत उपविजेतामा चित्त बुझाउनु परेको थियो । २९ औं मिनेटमा सन्तोष श्रेष्ठको गोलबाट एपिएफले अग्रता लिएको थियो । पहिलो हाफको अन्तिम मिनेटमा एपिएफका लागि हरि कार्कीले गोल गरे हरिले रुपबहादुर लामाको पासमा गोल गरेका हुन् ।

तर, चर्च ब्वाइजले दोस्रो हाफमा उत्कृष्ट पुरागमन गरेको थियो । ५३ औं मिनेटमा कप्तान बर्षात गुरुङले गोल गरे । एपिएफका गोलकिपर राजु नगरकोटीले हातमा आइसकेको बल छुटाएपछि त्यहि रिबाउन्डमा बर्षातले गोल गरेका थिए । खेल सकिन ६ मिनेट बाँकी रहदा अजे मार्टिनले बराबरी गोल गर्दै चर्च ब्वाइजलाई खेलमा फर्काएका थिए । मार्टिनले विशाल गुरुङको पासमा गोल गरेका हुन् ।

चर्च ब्वाइजका छिरिङ गुरुङ फाइनलको म्यान अफ दी म्याच भए र उनले ५ हजार रुपैयाँ प्राप्त गरे । विजेता चर्च ब्वाइजले उपाधिसहित ३ लाख १ हजार र एपिएफले १ लाख ५१ हजार रुपैयाँ प्राप्त गर्यो । एपिएफका युवराज खड्का उच्च गोलकर्ता बनेको प्रतियोगितामा चर्च ब्वाइजका कप्तान बर्षात सर्वोत्कृष्ट खेलाडी घोषित भए ।

युवराज र बर्षातले समान २५ हजार रुपैयाँ प्राप्त गरे । आयोजक दुधे युथ क्लबका सन्जित राई उदयीमान खेलाडी चुनिए र उनले ५ हजार रुपैयाँ पाए । झापाको शिवशताक्षी नगरपालिकाको दुधे क्लबले आयोजनामा असोज ४ गते सुरु भएको प्रतियोगितामा ८ टोलीको सहभागिता रहेको थियो ।