काठमाडौं – साफ यू १८ च्याम्पियनसिप विजेता नेपाली युवा टोलीका प्रत्येक सदस्यले कम्तीमा १ लाख रुपैयाँ नगद पुरस्कार पाउने भएका छन् । भुटानमा बुधबार सम्पन्न च्याम्पियनसिपमा हेड टु हेडका आधारमा बंगलादेशलाई पछि पार्दै नेपालले उपाधि जितेको थियो ।

दुई वर्षअघि काठमाडौंमा भएको साफ यू १९ च्याम्पियनसिप पनि नेपालले जितेको थियो । त्यति बेला एन्फाले टोलीका प्रत्येक सदस्यलाई १ लाख रुपैयाँ पुरस्कार दिएको थियो । यसपटक भने अखिल नेपाल फुटबल संघ (एन्फा) ले नगद पुरस्कार दिने निश्चित भएपनि त्यसको औपचारिक निर्णय कार्यसमितिको बैठकबाट लिएपछि सार्वजनिक गर्ने भएको छ ।

‘युवा टोली पुरस्कारको हकदार छ । पुरस्कार दिने र यो भन्दा अघिको भन्दा नघटाई दिनेमा पनि कुनै समस्या छैन, एन्फाका प्रमुख कार्यकारी अधिकृत इन्द्रमान तुलाधरले भने, ‘१ लाख रुपैयाँ भन्दा बढ्न पनि सक्छ । हामी कार्यसमितिको बैठकबाट निर्णय लिनेछौं ।’

एन्फाको विशेष साधारण सभा असोज २३ गते बस्दैछ । विशेष साधारण सभाको आसपासमा बस्ने बैठकले पुरस्कारको निर्णय लिने बताइएको छ । भुटानसँगको पहिलो खेल गुमाएपछि दबाबमा परेको नेपालले बाँकी सबै खेल जितेर उपाधि जितेको थियो । नेपालसँग पराजित बंगलादेश बाँकी सबै खेल जितेर पनि उपविजेतामा सिमित भयो ।

नेपाल र बंगलादेशको समान ९ अंक भएपनि बंगलादेशलाई हराएका कारण हेड टु हेडमा नेपाल विजेता बन्न सफल यो । बुधबार अन्तिम खेलमा नेपालले भारतलाई २–० ले हराएर विजेताको टुंगो लागेको थियो । त्यसअघि बुधबार बंगालदेशले भुटानलाई हराएका कारण नेपाल च्याम्पियन बन्न सफल भएको हो । युवा टोली आज स्वदेश फर्किसकेको छ ।