काठमाडौं (हाम्रो खेलकुद)– नेपाली राष्ट्रिय टोलीका गोलकिपर किरण चेम्जोङको माल्दिभियन क्लब टिसी स्पोर्टस्ले धिवेही प्रिमियर लिग (डिपिएल) मा गए राती जित हासिल गरेको छ । अघिल्लो खेलमा गोलरहित बराबरीमा रोकिएको टिसी स्पोर्टसले शनिबार मालहोसलाई १–० ले हराएको थियो ।

इब्राहिम माहुदीले गरेको गोल नै टिसी स्पोर्टस्को जितका लागि पर्याप्त रह्यो । माहुदी खेलको म्यान अफ दी म्याच बनेका छन् । टिसी स्पोर्टस अंक तालिकाको दोस्रो स्थानमा छ । १२ चरणको खेल सकिदा न्यू रेडियन्ट ३३ अंकका साथ शीर्षस्थानमा छ । अबको खेल सबैभन्दा महत्वपूर्ण हुने किरणले हाम्रो खेलकुदलाई बताए ।

‘हामी अझै ४ अंकले पछाडि छौं ’ उनले भने,‘त्यो खेल जित्न सकेको खण्डमा उपाधि जित्ने सम्भावना अन्तिम खेल सम्म पनि बाँकी रहन्छ । ’ ८ टोलीको सहभागिता रहेको डिपिएलमा अब २ चरणका खेल बाँकी छन् । राष्ट्रिय टोलीले खेलका कारण डिपिएल स्थगित भएको छ । पुनः डिपिएल सुरु भएपछि टिसीले पहिलो खेल न्यू रेडियन्टसँग खेल्नु पर्नेछ ।

अंक तालिकाको तेस्रो स्थानमा रहेको माजियाको २४ अंक छ । जुन टिसी स्पोर्टसको भन्दा ५ अंक कम हो । पुछारबाट दोस्रो स्थानमा रहेको मालहोसको ८ अंक छ । अर्को साता फिलिपिन्सविरुद्धको एसियन कप छनोट चरणको खेलका लागि किरण स्वदेश फर्कने तयारीमा छन् ।