लेस्टर (एजेन्सी) – प्रिमियर लिगको शीर्ष स्थानमा रहेको म्यानचेस्टर सिटी आज लेस्टर सिटीको सामना गर्दै छ । नेपाली समय अनुसार सो खेल रातिको ८.४५ बजे सुरु हुने छ ।
म्यानचेस्टर सिटीका लागि मुख्य डिफेन्डर निकोलास ओटामेन्डि यस खेलमा प्रतिबन्धित छन् भने भिन्सेन्ट कम्पनि र बेन्जामिन मेन्डि घाइते छन् । फरवार्ड सर्जियो अगुएरो र रहिम स्टेर्लिङ पनि पूर्ण फिट छैनन् । लेस्टरका लागि फरवार्ड भिन्सेन्ट इबोरा सामान्य घाइते छन् ।
सिटी यस सिजन लिगमा अपराजित रहेको छ र आफ्ना पछिल्ला ९ लिग खेलमा जित दर्ता गर्न सफल रहेको छ । सिटीको ११ खेलमा ३१ अंक रहेको छ भने १३ अंकसहित लेस्टर बाह्रौं स्थानमा छ ।
यसैगरी सिटीको प्रतिद्वन्दि म्यानचेस्टर युनाइटेड आज न्युकासल युनाइटेडसँग भिड्दै छ । युनाइटेडका मुख्य डिफेन्डर फिल जोन्स घाइते छन् भने न्युकासलका जमाल लास्केलेस, क्रिस्टियन आट्सु र मिकेल मेरिनो चोटका कारण खेलमा सहभागी हुने छैनन् ।
युनाइटेड हाल सिटीभन्दा ८ अंकले पछाडि रहेको छ । त्यस्तै युनाइटेडले आफ्नो पछिल्लो २२ घरेलु खेलमा हार बेहोरेको छैन भने न्युकासलसँग २९ खेलमा केवल दुई खेलमा पराजित भएको छ ।
प्रिमियर लिगमा आज खेलिने सम्पूर्ण खेलहरुको समय तालिका:
आर्सनल विरुद्ध टोटनह्याम – ६.१५ बजे
लेस्टर सिटी विरुद्ध म्यानचेस्टर सिटी – ८.४५ बजे
लिभरपुल विरुद्ध साउथह्याम्पटन – ८.४५ बजे
क्रिस्टल प्यालेस विरुद्ध एभरटन – ८.४५ बजे
बोर्नमथ विरुद्ध हडर्सफिल्ड – ८.४५ बजे
बर्नली विरुद्ध स्वान्सि सिटी – ८.४५ बजे
म्यानचेस्टर युनाइटेड विरुद्ध न्युकासल – १०.१५ बजे
