सबिन शेर्मा

झापा – दुई विभागिय टोली त्रिभुवन आर्मी क्लब र नेपाल एपिएफ क्लब वर्षमा पहिलो पटक आज झिलझिलेमा जारी सताक्षी गोल्ड कप फुटबल प्रतियोगिताको क्वार्टरफाइनलमा भिड्दैछन् । सिताक्षीमा पहिलो खेल जित्दै एपिएफ अन्तिम आठमा पुगेको थियो भने आर्मी वाइ पाएर पहिलो खेलमा उत्रदैछ । एपिएफले भारत मध्य प्रदेशको डायमन्ड अफ फुटबल एकेडेमीलाई ४–० को जित हासिल गरेको थियो ।

एपिएफ फुटबल टोली । फाइनल तस्बिर

पहिलो रोजाइका खेलाडी राष्ट्रिय टोलीबाट फर्केपछि दुवै टोली उत्साहित छन् । आर्मीका प्रशिक्षक नवीन न्यौपाने र एपिएफका रत्नकाजी महर्जन दुवैले जित्ने आशा व्यक्त गरे । ‘तिहार पछि हामी नियमित प्रशिक्षणमा छौं । तयारी राम्रै भएको छ’ आर्मीका प्रशिक्षक न्यौपानेले भने, ‘राष्ट्रिय टोलीबाट सबै फर्केकोले पनि हामी बलियो अवस्थामा छौं ।’

आर्मीका ५ र एपिएफका २ खेलाडी फिलिपिन्सविरुद्ध यहि साता भएको एसियन कप छनोट खेलमा टोलीमा थिए । आर्मीका भरत खवास, नवयुग श्रेष्ठ, जीतेन्द्र कार्की, जर्ज प्रिन्स कार्की र गोलकिपर विकेश कुथु नेपाली टोलीका नियमित सदस्य हुन् । न्यौपानेका अनुसार उनीहरु फर्कने वित्तिकै टोलीको मनोबल झन उचो हुने गरेको छ । उनले पाँचै जनाले आज पहिलो रोजाइबाट सुरु गर्ने बताए । न्यौपानेको प्रशिक्षणमा गत वर्ष १० वटा मोसफलका नकआउट प्रतियोगिताको फाइनल खेलेको आर्मीले ४ वटा उपाधि जितेको थियो ।

उता एपिएफका प्रशिक्षक महर्जन पनि टोली सन्तुलित रहेको बताउँछन् । ‘तयारी राम्रै । हाम्रो टोलीमा सन्तुलन पनि छ ’ उनले भने, ‘आर्मी सधै बलियो प्रतिद्वन्द्वि हो । तर हामी पनि सफल नतिजाका लागि प्रयास गर्नेछौं । ’ राष्ट्रिय टोलीबाट फर्केका अन्जन विष्ट र राजेन्द्र रावल दुवै आजको खेलमा पहिलो रोजाइमा पर्ने महर्जनले बताए ।
२०७२ यता यी दुई टोलीबीच आज हुने भेट तेस्रो हो । यसअघिका दुई खेलमा दुवै टोलीले एक एक खेल जितेका छन् । २०७२ पुसमा सातौं राष्ट्रिय खेलकुदको धरानमा भएको फुटबल फाइनलमा आर्मीलाई हराउँदै एपिएफले स्वर्ण पदक जितेको थियो । त्यो फाइनलमा २ गोल गरेका अन्जन अहिले टोलीमा फर्केका छन् । यसबीचमा अन्जनले केही खेल लक्ष्मी हुन्डाई मनाङ मस्र्याङ्दीबाट पनि खेलेका थिए ।

त्रिभुवन आर्मी फुटबल टोली । फाइनल तस्बिर

गत वर्ष सर्लाहीमा भएको राजर्षी गोल्ड कपको सेमिफाइनलमा भने आर्मीले एपिएफलाई हराएको थियो । त्यसयताको पहिलो खेल जित्नेका लागि दुवै आतुर देखिएका छन् ।आर्मी र एपिएफ दुवै टोलीको बी टिम राजधानीमा जारी चन्द्रागिरी गोल्डकप फुटबल प्रतियोगितामा प्रतिस्पर्धा गरिरहेका छन् । दुवै विभागिय टोली सेमिफाइनल पुगेका छन् ।

सताक्षी धाम स्पोर्टिङ क्लबको आयोजनामा जारी प्रतियोगितामा झापा ११ र आयोजक टोली सेमिफाइनल पुगिसकेका छन् । एपिएफ र आर्मीको विजेताले सेमिफाइनलमा झापाको सामना गर्नेछ । त्यस्तै रुपन्देही र मनाङको विजेताले आयोजक सताक्षीधामसँग प्रतिस्पर्धा गर्नुपर्ने हुन्छ । प्रतियोगिताको विजेताले ५ लाख र दोस्रो हुने टोलीले २ लाख ५० हजार रपैयाँ प्राप्त गर्नेछ ।