म्याड्रिड (एजेन्सी) – स्पेनिस ला लिगा अन्तर्गत आज ‘म्याड्रिड डर्बी’मा रियल म्याड्रिड र एट्लेटिको म्याड्रिड भिड्दै छन् । एट्लेटिको म्याड्रिडको घरेलु मैदानमा खेलिने सो खेल नेपाली समयअनुसार रातिको १.३० बजे सुरु हुने छ ।
रियल म्याड्रिडका लागि गोलकिपर केलर नाभास अझै चोटिल नै रहेकाले किको क्यासिल्लाले उनको स्थान लिने सम्भावना रहेको छ । त्यस्तै ड्यानि कार्जाभाल र राफायल भरान टोलीमा आगमन गर्न सक्ने छन् ।
यसै गरी घरेलु टोलीका लागि फिलिपे लुइस फिट रहेकाले सुरुवात गर्न सक्ने छन् । कोके र अन्जेल कोरिया पनि सुरुवाती ११ मा सामेल हुने देखिन्छ ।
एट्लेटिको म्याड्रिड आफ्नो पछिल्लो १५ खेलमा अपराजित रहेको छ । अर्को तर्फ रियल म्याड्रिडले खराब सुरुवात गरे बावजुद पछिल्लो ६ मध्ये ५ खेलमा जित दर्ता गरेको छ ।
यी दुई बीचको पछिल्लो खेलमा एट्लेटिको म्याड्रिड २-१ ले विजयी रहेको थियो । रियल र एट्लेटिको समान २३ अंकसहित तालिकाको क्रमश: तेस्रो र चौथो स्थानमा रहेका छन् ।
ला लिगामा आज खेलिने सम्पूर्ण खेलहरुको तालिका:
गेटाफे विरुद्ध आलाभेस – ५.४५ बजे
लेगानेस विरुद्ध बार्सिलोना – ९ बजे
सेभिल्ला विरुद्ध सेल्टा भिगो – ११.१५ बजे
