सताक्षी गोल्ड कप – मनाङ र रुपन्देही ११ भिड्दै

सबिन शेर्मा
झापा – लक्ष्मी हुन्डाई मनाङ मस्र्याङ्दीले आज झापाको झिलझिलेमा जारी सताक्षी गोल्ड कपको अन्तिम क्वार्टरफाइनलमा रुपन्देही ११ को सामना गर्दै छ । गत वर्ष चार वटा उपाधि जितेको मनाङको वर्षको यो पहिलो खेल हो ।

लक्ष्मी हुन्डाई मनाङ मस्र्याङ्दीको टोली । फाइल तस्बिर

उता मोरङ ११ लाई ३–१ ले हराउँदै रुपन्देहीले अन्तिम आठको यात्रा तय गरेको थियो । मनाङ वाई पाएर सोझै क्वार्टरफाइनल खेल्ने तयारीमा छ । आजको खेलको विजेताले आयोजक सताक्षी धाम स्पोर्टिङ क्लबको सामना गर्नेछ । आयोजक टोलीमा राष्ट्रिय टोलीका विमल घर्तीमगर, अनन्त तामाङ र विक्रम लामा छन् ।

आज मनाङबाट राष्ट्रिय टोलीबाट हालै सन्यास लिएका अनिल गुरुङसहित विराज महर्जन, विशाल राई, कमल श्रेष्ठ उत्रने तयारीमा छन् । गत साता फिलिपिन्ससँगको खेलमा सामान्य चोट लागेपछि सुजल श्रेष्ठ खेल्नेमा भने शंका रहेको विराजले हाम्रो खेलकुद डटकमलाई बताए ।

रुपन्देहीबाट अमर डंगोल, विजय धिमाल, रजिन धिमाल, लक्ष्मण रुचाल, दीलिप क्षेत्रीलगायत विदेशी खेलाडी रहेका छन् । प्रतियोगितामा झापा ११ र त्रिभुवन आर्मी क्लब पनि सेमिफाइनल पुगिसकेका छन् । प्रतियोगिताको विजेताले ५ लाख र दोस्रो हुने टोलीले २ लाख ५० हजार रपैयाँ प्राप्त गर्नेछ ।