रियलको नजरमा अगुएरो

म्याड्रिड (एजेन्सी) – रियल म्याड्रिडले अर्को सिजनको ट्रान्सफर विन्डोमा म्यानचेस्टर सिटीका स्ट्राइकर सर्जियो अगुएरा भित्राउने प्रयास गर्ने सम्भावना बढेको छ । युरोपका विभिन्न सञ्चारमाध्यमले २९ वर्षे अर्जेन्टिनी स्ट्राइकरलाई म्याड्रिड भित्राउने रियलको योजना रहेको उल्लेख गरेको छ ।

अघिल्लो साता मात्र अगुएरोले सन् २०१९ मा सिटीसँगको सम्झौता सकिएपछि नयाँ अनुभव बटुल्न अन्य विकल्प रोज्ने योजना सार्वजनिक गरेपनि उनी रियलमा जान सक्ने चर्चा सुरु भएको हो । २०११ मा ला लिगाको एट्लेटिको म्याड्रिडबाट सिटी पुगेका अगुएरो पुनः स्पेनिस लिगमा फर्किने सम्भावना बढेको हो ।

‘रियल र मिलान जस्ता क्लबले मलाई अवसर दिन इच्छुक रहेको थाहा पाए, , अगुएरोले गत साता अर्जेन्टिनासँग अन्तर्राष्ट्रिय टोलीमा रहँदा भनेका थिए,‘ मैले सिटीसँग थप १ वर्ष सम्झौता बढाउने प्रबन्ध रहेपनि म विकल्प खुला राख्न चाहन्छु । ’

रियलले अर्को सिजनको सुरुआतमा अगुएरोलाई भित्राउन ६० मिलियन युरोसम्म तिर्न तयार रहेको श्रोतहरुले जनाएका छन् । सिटीले उनको विकल्पमा आर्सनलका एलेक्सिस स्यान्चेजलाई भित्राउन सक्नेछ ।