निकोसिया (एजेन्सी) – च्याम्पियन्स लिगको समूह ‘एच’ अन्तर्गत आज राति साविक विजेता रियल म्याड्रिड एपोएल निकोसियाको सामना गर्ने छ । निकोसियाको घरेलु मैदानमा खेलिने सो खेल नेपाली समयअनुसार १.३० बजे सुरु हुने छ ।
रियल म्याड्रिडले आफ्नो पछिल्लो समूह चरणको खेल इङ्ग्लिस टोली टोटनह्यामसँग ३-१ ले गुमाएको थियो । त्यस्तै आफ्नो घरेलु लिगमा पनि रियल खराब लयबाट गुज्रिरहेको छ । त्यसैले यस खेलमा समूहको पछारमा रहेको निकोसियालाई हराउँदै लयमा फर्किने रियलको लक्ष्य हुने छ ।
रियल म्याड्रिड फेरी पनि आफ्नो पहिलो रोजाईको गोलकिपर केलर नाभासबिनै मैदानमा उत्रिने छ । ग्यारेथ बेल पनि घाइते रहेकाले खेलमा सहभागी हुने छैनन् । त्यस्तै ड्यानियल कार्जाभाल भने फिट छन् भने सर्जियो रामोसको नाक भाचिएको कारण उनलाई विश्राम दिने सम्भावना रहेको छ ।
निकोसियाका लागि भने सबै पहिलो रोजाईका खेलाडि फिट रहेका छन् । रियलले निकोसिया विरुद्धको आफ्नो पछिल्ला तीनै खेल जितेको छ भने च्याम्पियन्स लिगमा निकोसिया आफ्ना पछिल्ला ५ खेलमा जितविहीन रहेको छ ।
हाल रियलको ४ खेलमा ७ अंक रहेको छ भने निकोसियाको २ अंक छ । समूहको शीर्ष स्थानमा १० अंकसहित टोटनह्याम रहेको छ भने बोरुसिया डर्टमन्डको पनि २ अंक रहेको छ ।
