सबिन शेर्मा
झापा – मनाङ मर्स्याङ्दी क्लबले आयोजक सताक्षी धाम स्पोर्टिङ क्लबलाई २-१ ले पराजित गर्दै प्रतियोगिताको फाइनलमा स्थान बनाएको छ । मनाङले फाइनलमा विभागीय टोली आर्मीको सामना गर्ने छ ।
मनाङले खेलको चौथो मिनेटमै अग्रता लिन सफल भएको थियो । विशाल रानाको पासमा विमल रानाले गोल गर्दै स्कोर १-० बनाएका थिए । त्यस्तै आयोजकका लागि रेजिन सुब्बाले २७ औं मिनेटमा गोल गर्दै आफ्नो टोलीलाई खेलमा फर्काएका थिए ।
खेलको ८७ औं मिनेटमा ‘म्यान अफ द म्याच’ विशाल राईले निर्णायक गोल गर्दै मनाङको फाइनलमा स्थान सुनिश्चित गरेका थिए । आयोजक सताक्षी धामले पनि खेलभरि थुप्रै अवसरहरु पाएका थिए तर तिनको सदुपयोग भने गर्न सकेको थिएन ।
खेलको २१ औं मिनेटमा विमल घर्ती मगरको प्रहार पोस्टमा लागेर समेत फर्किएको थियो । बाहिरिएको आयोजक टोलीबाट आज अनन्त तमाङ, विक्रम लामा र विशाल श्रेष्ठ लगायत राष्ट्रिय खेलाडिहरु खेलेका थिए ।
अब मनाङले फाइनलमा आर्मीको सामना गर्ने छ । आर्मीले सेमिफाइनलमा झापालाई हराउँदै फाइनल प्रवेश गरेको थियो । फाइनल खेल विहीबार खेलिने छ । प्रतियोगिताको विजेताले ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछन् ।
