म्यानचेस्टर (एजेन्सी) – च्याम्पियन्स लिगको समूह ‘एफ’अन्तर्गत इङ्ग्लिस टोली म्यानचेस्टर सिटीले फेयेनूर्डलाई १-० ले हराएको छ । सिटीको जितमा निर्णायक गोल रहिम स्टेर्लिङले गरेका थिए ।
यस जितसँगै सिटीको ५ खेलमा १५ अंक रहेको छ र समूहको विजेता हुने पनि पक्का भएको छ । समूहको अन्य खेलमा नेपोलीले शाख्तार डोनेस्कलाई ३-० ले हराएको थियो । शाख्तारको ९ अंक रहेको छ भने नेपोलीको ६ अंक छ । फेयेनूर्ड भने अंकविहीन रहँदै समूहको पुछारमा रहेको छ ।
त्यस्तै अर्को इङ्ग्लिस टोली टोटनह्यामले बोरुसिया डर्टमन्डमाथि २-१ को जित हात पारेको छ । टोटनह्यामका लागि ह्यारी केन र हिउङ मिन सनले गोल गरेका थिए । घरेलु टोली डर्टमन्डका लागि एक गोल पियर एम्रिक अबामेयाङले गरेका थिए । टोटनह्याम पहिले नै अन्तिम १६ मा छनोट भइसकेको थियो ।
यसैगरी समूह ‘ई’मा ३-० को अग्रता लिएको लिभरपुल दोस्रो हाफमा ३ गोल खाँदै सेभिल्लासँग रोकिन पुग्यो । लिभरपुलका लागि रोबर्टो फिर्मिनोले दुई गोल र साडियो मानेले एक गोल गरेका थिए ।
गए राति च्याम्पियन्स लिगका अन्य खेलहरुको नतिजा:
बेसिक्टास १-१ पोर्टो
स्पार्टाक मस्को १-१ मेरिबोर
मोनाको १-४ आरबी लेपजिग
