सबिन शेर्मा
झापा – ए डिभिजन टोली लक्ष्मी हुन्डाई मनाङ मस्र्याङ्दी र त्रिभुवन आर्मी क्लब वर्षको दोस्रो उपाधिका लागि भोली एक अर्कोको सामना गर्दैछन् । झापाको झिलझिलेमा जारी सताक्षी गोल्ड कप फुटबल प्रतियोगिताको फइनलमा यी दुई टोलीले एकअर्काको सामना गर्नेछन् । यी दुई टोलीबीच यो वर्षको भने पहिलो भेट हुनेछ ।

 

नकआउट फुटबलमा गत वर्ष मनाङ सर्वाधिक सफल टोली रहेको थियो भने त्यसपछिका सफल टोली आर्मी र सिएमजी क्लब संकटा रहेका थिए । मनाङले चारवटा उपाधि जित्दा आर्मी र सिएमजीले समान ३ नकआउट उपाधि जितेका थिए । मनाङ र आर्मीमध्ये जसले जितेपछि यो टोलीको दोस्रो उपाधि हुनेछ ।

भदौमा मनाङले चितवनमा जेसिज कप फुटबल प्रतियोगिताको उपाधि जितेको थियो भने आर्मीले त्यो भन्दा अघि विशाल स्मृति गोल्ड कपको उपाधि जितेको थियो । गत वर्ष मनाङ र आर्मीबीच ३ वटा फाइनल भएको थियो । जसमध्ये दुहबी गोल्ड कप र हेटौडा गोल्ड कपमा आर्मीले बाजी मारेको थियो भने मनाङले राजर्षी गोल्ड कपको उपाधि जितेको थियो ।

यसपटकको फाइनल पनि प्रतिस्पर्धात्मक हुने अनुमान गर्छन् आर्मीका प्रशिक्षक नवीन न्यौपाने । खेलाडीका रुपमा लामो समय मनाङमा बिताएका प्रशिक्षक न्यौपानले भने,‘हाम्रो खेलाडीमा चोटको कुनै समस्या छैन । हामीले यहाँ पनि राम्रो प्रदर्शन गरिरहेका छौं । आशा छ भोलीको फाइनलमा हामी राम्रो चुनौति दिनेछौं ।’दुवै टोलीका राष्ट्रिय खेलाडी टोलीमा फर्किसकेकोले खेल प्रतिस्पर्धात्मक हुने उनले अनुमान गरेका छन् ।

‘मनाङ सदाबहार बलियो टोली हो । त्यसमाथि सेटका सबै खेलाडी आएपछि झन मजबुद भएको छ’ उनले भने, ‘तर मनाङभन्दा हामी नियमति अभ्यासमा रहेकोले त्यसको फाइदा पुग्न सक्दछ ।’ दुवै टोली उत्तिकै शसक्त भएकाले उनले प्राप्त मौका लागि जसले पहिला सदुपयोग गर्न सक्छ त्यहि टोलीको जित्ने सम्भावना बढी हुने बताउँछन् ।

क्वार्टरफाइनलमा अर्को विभागिय टोली एपिएफललाई ३–२ ले हराउँदै अघि बढेको आर्मीले सेमिफाइनलमा झापामाथि ३–० को एकतर्फी जित निकालेको थियो । जसमा नवयुग श्रेष्ठदले २ गोल गरेका थिए । अर्को तिर मनाङको यात्रा भने आर्मीको तुलनामा केही कठिन रह्यो । रुपन्देहीसँग टाइब्रेकरमा ४–१ को जित निकाल्दै अघि बढेको मनाङले सेमिफाइनलमा आयोजक सताक्षी धाम स्पोर्टिङलाई हराउन थप समय सम्म कुर्नु परेको थियो ।

अन्तमा विशाल राईको निर्णायक गोलमा २–१ को जितसहित मनाङ अन्तिम दुईमा पुगेको थियो । मनाङका कप्तान अनिल गुरुङ पनि आर्मीका प्रशिक्षक न्यौपाने जस्तै खेल प्रतिस्पर्धात्मक हुने अनुमान गर्दछन् । ‘यस्तो खेलमा धेरै मौका पाउन कठिन हुन्छ । थोरै मौकामा जसले क्लिक गर्न सक्छ जित्ने त्यहि टिम हो ।

हामी पनि अहिले धेरै सेट भइसकेका छौं’ हालै अन्तर्राष्ट्रिय फुटबलबाट सन्यास लिएका अनिलले भने, ‘आर्मी भनेको सधै फिटनेसमा माथि रहने टिम हो । हामीले आफ्नो क्षमता अनुसारको प्रदर्शन गर्न सक्यौ भने उपाधि जित्ने सम्भावना बढी रहन्छ । ’सताक्षी गोल्ड कपको विजेताले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।