म्यानचेस्टर (एजेन्सी)– म्यानचेस्टर सिटीका मिडफिल्डर याया टुरेले जारी सिजनमा धेरै खेल्न मौका नपाएपनि आफु दिक्क नभएको बताएका छन् । ३४ वर्षे मिडफिल्डरले पेप ग्वार्डिओलाको टोलीबाट यो सिजन मात्र ५ खेल खेलेका छन् । यद्दपी उनले गत राति च्याम्पियन्स लिगमा फेयनोर्डसँग भने सिटीका लागि ७५ मिनेट खेल्ने मौका पाए ।
खेलपछि यो सिजन धेरै खेल्ने मौका नपाएको बारे प्रश्नको जवाफ दिने क्रममा टुरेले भने,‘तिमी म खेलेको हेर्न चाहन्छौ भने त्यो विषय प्रशिक्षकलाई भन ।’ मौका कम पाएपनि उनले आफु दिकदार नभएको भने प्रष्ट पारेका छन् । ‘मेरो अनुहारमा हेर । के म दिक्क भएको जस्तो देखिन्छ ’ उनले थपे, ‘म यहाँ रमाइरहेको छु । यदि म दिक्क मानि रहेको हुन्थ्यो प्रशिक्षकलाई आफु बेन्चमा बस्न भन्दा घर जान तयार हुने बताउथे ।’
रहिम स्टर्लिङले खेलको एकमात्र गोल गर्दै सिटीलाई च्याम्प्यिन्स लिगमा लगातार पाँचौं जित दिलाएका थिए । टुरेले टोलीले उच्च प्रदर्शन गरिरहेको बताए । ‘यो मनोबललाई निरन्तरता दिन अहिलेको आवश्यकता हो’ उनले भने, ‘हामीले परिस्थितिलाई बुझेर त्यहि अनुरुप केन्द्रित हुनुपर्दछ । हाम्रो टोली गतिशील छ, यो मलाई मन पर्दछ । प्रशिक्षकलाई पनि मन पर्दछ ।’
सञ्चामाध्यमका बारेमा बोल्दै उनले भने, ‘बार्सिलोना रहँदा मैले सिकेको कुरा के हो भने हामीले कुनै पनि पत्रपत्रिकाका विषय सुन्न आवश्यक छैन । किनकी आफुले उत्कृष्ट छु भन्ने मान्ने हो भने बलियो टोली तयार हुन्छ र कसैले त्यसलाई कमजोर बनाउन सक्दैन । ’ सन् २०१० मा बार्सिलोनाबाट सिटी पुगेका टुरेले क्लबका लागि ३ सय बढी खेल खेल्दै ७९ गोल गरिसकेका छन् ।
