सडन डेथमा रुपन्देही पराजित
काकरभिट्टा (हाम्रो खेलकुद)– लक्ष्मी हुन्डाई मनाङ मस्र्याङ्दी क्लब मेची नेत्रालय काकरभिट्टा गोल्ड कप फुटबल प्रतियोगिताको सेमिफाइनलमा पुगेको छ । काकरभिट्टा माविको मैदानमा आज अग्नी रुपन्देही ११ लाई सडन डेथमा ७–६ ले हराउँदै मनाङ मोफसलकै सर्वाधिक पुररस्कार राशी भएको भनिएको नकआउट फुटबल प्रतियोगिताको अन्तिम चारमा पुगेको हो ।
फाइल तस्बिर
आर्मीसँग सताक्षी गोल्ड कप फाइनलमा पराजित मनाङले रुपन्देहीसँग निर्धारित ९० मिनेटको समय गोल रहित बराबरी खेलेको थियो । टाइब्रेकरमा ५–५ को बराबरी भएपछि सडन डेथमा खेलको निर्णय भनएको थियो । विमल घर्तीमगरसहित राष्ट्रिय टोलीका ९ खेलाडी मनाङबाट खेलेका थिए ।
सडन डेथमा रुपन्देहीका सौरभ मगरको प्रहारलाई मनाङ गोलकिपर दीनेश थापामगरले रोकेका थिए । दीनेश खेलको म्यान अफ दी म्याच घोषित भए र १० हजार रुपैयाँ प्राप्त गरे । सडन डेथमा मनाङका लागि विक्रम लामा र विमल रानाले गोल गरे भने रुपन्देहीका लागि विजय धिमालले मात्र गोल गर्न सके ।
त्यसअघि पेनाल्टी सुटआउटमा मनाङका लागि कप्तान अनिल गुरुङ, विमल बस्नेत, सुजल श्रेष्ठ, हेमन गुरुङ र डोना थापाले गोल गरे । रुपन्देहीका लागि निरज बस्नेत, रजिन धिमाल, रुपेश केसी, दीपक राई र गोलकिपर दीलिप क्षेत्रीले गोल गरे ।
