म्याड्रिड (एजेन्सी) – साविक विजेता रियल म्याड्रिडले स्पेनिश ला लिगामा मालागालाई ३-२ ले हराएको छ । रियलको जितमा क्रिस्टियानो रोनाल्डोले निर्णायक गोल गरेका थिए ।
घरेलु टोली रियल म्याड्रिडले खेलको नवौं मिनेटमै करिम बेन्जेमाको प्रहारमार्फत अग्रता लिन सफल भएको थियो । तर सो गोलको १० मिनेटमै मालागाका डिएगो रोलानले गोल गर्दै स्कोर १-१ पारेका थिए ।
लगत्तै टोनि क्रुसको पासमा कासेमिरोले गोल गर्दै रियललाई खेलमा पुन: अग्रता दिलाएका थिए । त्यस्तै दोस्रो हाफमा मालागा फेरि खेलमा फर्किन सफल भएको थियो ।
खेलको ५८ औं मिनेटमा गोन्जालो कास्ट्रोले गोल गर्दै खेललाई बराबरी बनाएका थिए । तर ७६ औं मिनेटमा रियलका स्टार खेलाडि रोनाल्डोले गोल गर्दै आफ्नो टोलीको जित सुनिश्चित गरे ।
पाएको पेनाल्टीमा चुके पनि रिबाउन्डलाई भने परिणत गर्दै रोनाल्डोले निर्णायक गोल गरेका थिए । सो गोल रोनाल्डोको ला लिगामा दोस्रो गोल थियो । यस जितसँगै रियल अंकतालिकामा १३ खेलमा २७ अंकसहित तेस्रो स्थानमा यथावत् छ ।
