म्यानचेस्टर (एजेन्सी) – प्रिमियर लिगको दोस्रोमा रहेको म्यानचेस्टर युनाइटेडले ब्राइटनमाथि १-० को जित दर्ता गरेको छ । युनाइटेडको जितमा ब्राइटनका लुइस डंकले आत्मघाती गोल गरेका थिए ।
युनाइटेडले पहिलो हाफमा निकै अवसरहरु सिर्जना गरे पनि ब्राइटनले रक्षात्मक खेल्दै घरेलु टोलीलाई रोकेको थियो । तर खेलको ६६ औं मिनेटमा एस्ली योङले गरेको प्रहार ब्राइटनका लुइस डन्कलाई लागेर आत्मघाती गोल भएको थियो । सो गोल युनाइटेडलाई जित दिलाउन पर्याप्त रह्यो ।
त्यस्तै अर्को बलियो टोली टोटनह्याम वेस्ट ब्रोमसँग १-१ को बराबरीमा रोकिन पुग्यो । भ्रमणीय टोलीका लागि सालोमन रोन्डोनले खेलको चौथो मिनेटमै स्कोर १-० बनाएका थिए । तर टोटनह्यामका मुख्य स्ट्राइकर ह्यारी केनले दोस्रो हाफमा एक गोल फर्काउँदै टोलीका लागि १ अंक बटुलेका थिए ।
त्यस्तै मध्यरातको खेलमा लिभरपुल र चेल्सीले पनि १-१ को बराबरी खेलेका छन् । चेल्सीका पूर्व खेलाडि मोहम्मद सालाहले घरेलु टोलीलाई दिलाएको अग्रतालाई चेल्सीका मिडफिल्डर विलियनले अन्तिम समयतिर बराबरी पारेका थिए ।
हाल म्यानचेस्टर युनाइटेड १३ खेलमा २९ अंक सहित दोस्रोमा छ भने टोटनह्याम २४ अंकसहित चौथो स्थानमा यथावत् छ । ब्राइटन १६ अंकका साथ नवौं स्थानमा छ भने १७ औं स्थानको वेस्ट ब्रोमको ११ अंक रहेको छ । चेल्सी २६ अंकसहित तेस्रोमा छ भने २३ अंकसहित लिभरपुल पाँचौंमा छ ।
