पेरिस (एजेन्सी) – गए राति फ्रान्सेली लिग १ मा खेलिएको खेलमा अग्रस्थानमा रहेको पेरिस सेन्ट जर्मन (पिएसजी) ले लिललाई ३-१ ले हराएको छ । पिएसजीको जितमा स्ट्राइकर किलियन बाप्पे नायक रहे ।
खेलको २८ औं मिनेटमा बाप्पेको पासमा डि मारियाले हेडिङ गर्दै टोलीलाई अग्रता दिलाएका थिए । त्यस्तै दोस्रो हाफको सुरुवातमा डि मारियाको पासमा जाभियर पास्टोरेले राम्रो प्रहार गर्दै घरेलु टोलीको अग्रता दोब्बर बनाएका थिए ।
अन्वर एल गाजिले ८६ औं मिनेटमा गोल गर्दै लिललाई खेलमा फर्काउन खोजेका थिए । तर खेलको अन्तिम मिनेटतिर काउन्टर अट्याकमा बाप्पेले गोल गर्दै पिएसजीको पूरा ३ अंक सुनिश्चित गरे ।
यस जितसँगै पिएसजी अंकतालिकाको अग्रस्थानमा ९ अंकले अगाडि रहेको छ । त्यस्तै यस हारसँगै लिल १८ औं स्थानमा झरेको छ ।
