बेलबारी (हाम्रो खेलकुद)– त्रिभुवन आर्मी क्लब र लक्ष्मी हुन्डाई मनाङ मस्र्याङ्दी क्लबीच २४ दिनमा तेस्रो नकआउट फुटबल प्रतियोगिताको फाइनलमा भेट हुँदैछ । यी दुई टोली दोस्रो मनमोहन स्मृति दुहवी गोल्ड कप फुटबल प्रतियोगिताको उपाधिका लागि आज प्रतिस्पर्धा हुँदैछ ।
मनाङ (माथि) र आर्मी टोली । फाइल तस्बिर
अघिल्लो महिना भएको दुवै फाइनलमा आर्मीले बाजी मारेको थियो । मंसिर ७ गते सताक्षी गोल्ड कप फुटबल प्रतियोगिताको फाइनलमा मनाङलाई हराएको आर्मीले मंसिर १५ गते मेची नेत्रालय काकरभिट्टा गोल्ड कपमा पनि पुनः हराएको थियो । त्यसयता यी दुई टोलीबीच पहिलो पटक आज भेट हुँदैछ । यो वर्ष यी दुई टोलीले ४ उपाधि जितिसकेका छन् । आर्मीले ३ उपाधि जित्दा मनाङले एउटा उपाधिमा चित्त बुझाएको छ ।
वैशाखमा आर्मीले वीरगन्जमा विशाल स्मृति गोल्ड कप र भदौंमा मनाङले चितवन पुगेर जेसिज कपको उपाधि उचालेको थियो । आजको फाइनल जिते आर्मीले वर्षको चौथो र मनाङले दोस्रो उपाधि जित्नेछ । गत वर्ष नकआउट फुटबलमा मनाङ सबैभन्दा सफल टोली रहेको थियो । मनाङले ४ उपाधि जित्दा आर्मी र संकटाले समान ३ उपाधि जितेका थिए । यसपटक आर्मी अरुभन्दा अगाडि लागेको छ ।
मंसिर १५ को काकरभिट्टा गोल्ड कपको फाइनल टाइब्रेकरमा जितेको आर्मीले मंसिर ६ को सताक्षी गोल्ड कपको फाइनलमा २–१ को जित हासिल गरेको थियो । आर्मी र मनाङ दुवै राष्ट्रिय टोलीका सदस्यका बाल्को उपस्थिति रहेका टोली हुन् । मनाङमा राष्ट्रिय टोलीका कप्तान विराज महर्जन, गत महिना मात्र अन्तर्राष्ट्रिय फुटबलबाट सन्यास लिएका अनिल गुरुङ, सुजल श्रेष्ठ, विशाल राई, कमल श्रेष्ठलगायतका खेलाडी रहेका छन् ।
अर्को तिर आर्मीमा भरत खवास, नवयुग श्रेष्ठ, जीतेन्द्र कार्की, जर्ज प्रिन्स कार्की, गोलकिपर विकेश कुथु जस्ता खेलाडी छन् । मनमोहन स्मृति प्रतिष्ठान र इलेभन एरोजको संयुक्त आयोजनामा जारी प्रतियोगिताको विजेता टोलीले उपाधिसहित ४ लाख १ हजार रुपैयाँ प्राप्त गर्नेछ ।
