काठमाडौं (हाम्रो खेलकुद) – माल्दिभियन क्लब टिसी स्पोर्टस्सँगको एक वर्षे सम्झौता सकिएसँगै नेपाली राष्ट्रिय फुटबल टोलीका नम्बर १ गोलकिपर किरण चेम्जोङ आज स्वदेश फर्कदैछन् । नयाँ सम्झौताका विषयमा छलफल चलिरहेपनि सिजन ब्रेकसँगै किरण स्वदेश फर्कन लागेका हुन् ।

नयाँ सिजन जनवरीबाट मात्र सुरु हुने बताइएको छ । स्वदेश फर्कनु अघिल्लो राति किरणसम्मिलत टिसी स्पोर्टस् ले न्यू रेडियन्टसँग प्रेसिडेन्ट्स कपको फाइनल भएको थियो । जसमा टिसी स्पोर्टस् ३–० ले पराजित भएको थियो ।

यो सिजन न्यू रेडियन्टले ३ वटा उपाधि जित्दा किरणको टोली सबैमा उपविजेता रह्यो । न्यू रेडियन्टले यसअघि धिवेही प्रिमियर लिग (डिपिएल) र एएफए कपको उपाधि जितेको थियो । केहि दिनअघिको एफए कप फाइनलमा टिसी स्पोर्टस् न्यू रेडियन्टसँग टाइब्रेकरमा पराजित भएको थियो । यो सिजन न्यू रेडियन्टसँगका सबै ७ खेलमा टिसी स्पोर्टस् पराजित भयो ।

टिसी स्पोर्टस् को आफ्नो पहिलो सिजनमा किरण एउटा उपाधि जित्न सफल भएका थिए । गत वर्ष पुसमा टिसीमा आबद्ध भएको केहि समयमै किरण सम्मिलित टोलीले बंगलादेशमा शेख कमाल अन्तर्राष्ट्रिय क्लब च्याम्पियनसिप जितेको थियो । माल्दिभ्स फुटबल अवार्ड आज हुँदैछ । माल्दिभ्स फुटबल डट कम र माल्दिभ्स फुटबल संघको संयुक्त आयोजनामा हुने अवार्डको विदेशी उत्कृष्ट खेलाडी र उत्कृष्ट गोलकिपर दुवैम किरण मनोनयनमा परेका छन् ।