काठमाडौं (हाम्रो खेलकुद)– नेपाली महिला फुटबल टोली फिफा वरियतामा तीन स्थान माथि उक्लदै ९१ औं स्थानमा पुगेको छ । डिसेम्बरका लागि फिफाले जारी गरेको वरियतामा नेपाल दक्षिण एसियाली राष्ट्रबीच दोस्रो स्थानमा रहेको छ ।
महिला फुटबलको वरियतामा सन् २००९ यता नेपालको यो उच्च वरियता हो । २००९ मा नेपाल ९२ औं स्थामा रहेको थियो । नेपाल वरियताको सबैभन्दा खराब अवस्थामा रहने क्रममा १ सय १६ औं स्थानमा रहेको थियो ।
नेपाल भन्दा माथि भारत ५७ औं स्थानमा छ । नेपाल भन्दा पछि बंगलादेश सयौं, श्रीलंका एक सय एर्कौ र भुटान १ सय १४ औं स्थानमा रहेको छ । वर्षको सुरुआतमा महिला साफ च्याम्पियनसिप खेलेको नेपालले मेमा मलेसियासँग दुई मैत्रीपूर्ण खेल खेलेको थियो ।
जसमा नेपाल एउटामा बराबरीमा रोकिएको थियो भने अर्कोमा पराजित भएको थियो । त्यसयता नेपाली टोलीले कुनै प्रतियोगिता वा मैत्रीपूर्ण खेल खेलेको छैन । फिफा वरियतामा अमेरिका पहिलो, जर्मनी दोस्रो र इङ्ल्यान्ड तेस्रो स्थानमा रहेको छ ।
