काठमाडौं (हाम्रो खेलकुद)– हात्तिबनको लिटिल एन्जेल्स स्कुल र झापा महेशपुरको मोरान मेमोरिअल २२ औं फादर मोरान मेमोरियल फुटबल प्रतियोगिताको सेमिफाइनलमा पुगेका छन् । आयोजक सेन्ट जेभिर्यस गोदावरीको मैदानमा भएको खेलमा लिटिल एन्जेल्सले लुभूको नेपाल डन बोस्कोलाई पेनाल्टीमा ४–३ ले हराएको थियो ।
निर्धारित ६० मिनेटको खेल ३–३ को बराबरीमा टुंगिएपछि टाइब्रेकरमा लिटिल एन्जेल्सले बाजी मारेको थियो । नियमित समयमा डन बोस्कोले पटक पटकको अग्रतालाई जोगाउन सकेन । चौथो मिनेटमा विशन श्रेष्ठको गोलबाट डन बोस्कोले अग्रता लिएपनि भार्गव सिलवालले सातौं मिनेटमा लिटिल एन्जेल्सका लागि बराबरी गोल फर्काए ।
विशनले २० औं मिनेटमा दोस्रो गोल गरे भने २९ औं मिनेटमा आत्मघाती गोल हुँदा डन बोस्कोले ३–१ को अग्रता लिएको थियो । तर, भार्गवले ३३ औं र लक्ष्य महर्जनले ४५ औं मिनेटमा गोल गर्दै लिलिट एन्जेल्सलाई खेलमा फर्काएका थिए । विजेता टोलीका भार्गव खेलको म्यान अफ दी म्याच घोषि भए ।
अर्को खेलमा मोरानले सेन्ट जेभियर्स जावलाखेललाई ४–२ ले हरायो । युवराज राजवंशीले पहिलो मिनेटमा गोल गर्दै मोरानलाई अग्रता दिलाए भने आशुतोष यादवले सातौं मिनेटमा सेन्ट जेभियर्सका लागि बराबरी गोल गरे । गंगाराम महर्जनले १४ औं मिनेटमा गोल गर्दै मोरानलाई पुनः अग्रता दिलाए भने २२ औं मिनेटमा एलेजेन्डर उरावले गोल गरे ।
सेन्ट जेभियर्सका आशुतोषले २३ औं मिनेटमा व्यक्तिगत दोस्रो गोल गरे । तर गंगारामले ५८ औं मिनेटमा अर्को गोल थप्दै मोरानको जित पक्का गरे । मोरानका बुधहरि हस्दा खेलको म्यान अफ दी म्याच चुनिए । प्रतियोगिताको सेमिफाइनलमा बिहीबार आयोजक सेन्ट जेभियर्सको ए र मोरान तथा लिटिल एन्जेल्स र क्रेस्सेन्ट एकेडेमीबीच प्रतिस्पर्धा हुनेछ ।
