म्याड्रिड (एजेन्सी)– पेरिस सेन्ट जर्मेन (पिएसजी) का सुपरस्टार नेयमार रियल म्याड्रिड जाने सम्भावनालाई प्रशिक्षक जिनेदिन जिदानले अस्वीकार गरेका छन् । नेयमारको आगमनले टोलीको ड्रेसिङ रुममा समस्या हुन सक्ने उनको अनुमान छ ।
बार्सिलोना छाडेर यो सिजनको सुरुआतमा १ सय ९८ मिलियन पाउन्डमा पिएसजी पुगेका नेयमार फेरि स्पेन फर्कने चर्चा केहि समय यता चलिहरेको छ । रियलका शीर्ष खेलाडी भने थप सफलताका लागि क्लबमा नेयमारलाई देख्न चाहन्छन् । तर, जिदान भने त्यसको विपक्षीमा रहेको बताइएको छ ।
ब्राजिलियन स्टारलाई भित्राउँदा त्यसले क्लब आक्रामक खेलाडी क्रिस्टियानो रोनाल्डो, गेराथ बेल र करिम बेन्जिमामा नाकारात्मक असर पर्न सक्नेमा फ्रान्सेली जिदान सचेत छन् । यद्दपी रोनाल्डाले नेयमारसँग आफ्नो गहिरो मित्रता रहेको उल्लेख गर्दै पिएसजीमा जाँदा शुभकामना पनि दिएका थिए ।
बेल भने म्यानचेस्टर युनाइटेड जाने हल्ला चल्न थालेको पनि निकै भइसकेको छ । बार्सिलोनाका सुपर स्टार लियोन मेस्सीसँग पनि नेयमारको राम्रो सम्बन्ध छ । तर, उनी बार्सिलोनाको चर्को प्रतिद्वन्दिता रहेको रियलमा आबद्ध भएको खण्डमा भने मेस्सी निराश हुन सक्नेछन् । चार वर्ष बार्सिलोनामा बिताएका नेयमार धेरैलाई आश्चार्यमा पार्दै पिएसजी गएका थिए ।
