ब्रिस्टोल सिटी (एजेन्सी) – उपाधि दाबेदार मानिएको म्यानचेस्टर युनाइटेड इङ्ग्लिस लिग कप (काराबाओ कप) को क्वाटरफाइनल चरणबाटै बाहिरिएको छ । युनाइटेड ब्रिस्टोल सिटीसँग २-१ ले पराजित भएको हो ।
दुवै टोलीले पहिलो हाफमा गोल गार्ने केहि मौका पाए पनि सो हाफ गोलरहित भएको थियो । दोस्रो हाफको ५१ औं मिनेटमा भने ब्रिस्टोलका जो ब्रायनले गोल गर्दै टोलीलाई अग्रता दिलाए ।
चोटबाट फर्केका ज्लाटान इब्राहिमोबिचले ५८ औं मिनेटमा गोल गर्दै टोलीलाई खेलमा फर्काएका थिए । तर खेलको इन्जुरी समयमा ब्रिस्टोलका कोरे स्मिथले गोल गर्दै टोलीलाई ऐतिहासिक जित दिलाएका हुन् ।
अन्य खेलमा चेल्सीले अर्को इङ्ग्लिस प्रिमियर लिग टोली बोर्नमथलाई २-१ ले हराउन सफल रह्यो । चेल्सीका लागि विलियनले टोलीलाई अग्रता दिलाएका थिए भने बोर्नमथका रायन गोस्लिङले ९० औं मिनेटमा खेल बराबरी बनाएका थिए ।
त्यसको एक मिनेटमै अल्भारो मोराटाले गोल गर्दै चेल्सीलाई जित दिलाए । यस अघि म्यानचेस्टर सिटी र आर्सनल सेमिफाइनल प्रवेश गरिसकेका छन् । सेमिफाइनलमा चेल्सीले आर्सनलको सामना गर्ने छ भने सिटी ब्रिस्टोलसँग भिड्ने छ ।
