पोखरा (हाम्रो खेलकुद) – पोखरामा जारी छैटौं संगम कपको फाइनलमा बाजापाटन (बी) थटिन पुग्न सफल भएको छ । सेमिफाइनलमा गार्डेन क्लबलाई पेनाल्टीमा २-१ ले हराउँदै बी थटिन फाइनलमा प्रवेश गरेको हो ।
७० मिनेटको निर्धारित समय २-२ को स्कोरमा समाप्त भएपछि खेल अतिरिक्त समयमा गएको थियो । तर सो समयमा दुवै पक्षले गोल गर्न नसकेपछि खेल पेनाल्टिमा पुगेको थियो ।
बी थटिनले खेलको २८ औं मिनेटमा विश्वास श्रेष्ठको गोल मार्फत अग्रता लिएको थियो भने खेलको ३५ औं मिनेटमा गोविन केसीले सो अग्रता दोब्बर पारेका थिए । तर दोस्रो हाफमा गार्डेनका दिवस उदयले एक गोल र बी थटिनका अजय गुरुङले एक आत्मघाती गोल गर्दा खेल बराबरी भएको थियो ।
पेनाल्टीमा भने बी थटिनले बाजी मार्न सफल रह्यो । विजयी टोलीका लागि विदेशी मुलका चिब्रा र दिलीप क्षेत्रीले गोल गरेका थिए भने गार्डेनबाट विनोद गुरुङले गोल गरेका थिए ।
अब बी थटिनले भोलि हुने सहारा क्लब र एल जी एशोसिएसन बीचको सेमिफाइनलको विजेतासँग भिड्ने छ । सहारा र एल जी बीचको आजको खेल २-२ को स्कोर रहँदा खराब प्रकाशका कारण स्थगित भएको थियो । सो खेल भोलि बिहान ८.३० बजे सुचारु हुने छ भने फाइनल खेल दिउसो १ बजे पछि सुरु हुने छ ।
