काठमाडौं (हाम्रो खेलकुद)– आयोजक सेन्ट जेभियर्स गोदावरी ए र लिटिल एन्जेल्स स्कुल हात्तिबन २२ औं फादर मोरान मेमोरियल फुटबल प्रतियोगिताको उपाधिका लागि भिड्ने भएका छन् ।
आयोजकले झापाको मोरान मेमोरियललाई टाइब्रेकरमा ३–० ले हराउँदै अन्तिम दुईको यात्रा तय गरेको थियो । निर्धारित समय १–१ को बराबरीमा टुंगिएपछि खेलको निर्णय पेनाल्टीमा भएको थियो । खेलमा लिएको अग्रता जोगाउन नसकेपछि मोरान फाइनल पुग्न सकेन ।
युवराज राजवंशीको गोलमा मोरानले अग्रता लिएपनि सबल महर्जनले ३५ औं मिनेटमा आयोजकका लागि बराबरी गोल फर्काएका थिए । पराजित टोलीका बुधहरि हास्दा खेलको म्यान अफ दी म्याच घोषित भएका थिए ।
अर्को खेलमा लिटिल एन्जेल्सले क्रेस्सेन्ट एकेडेमी अंग्रेजी स्कुल गोदावरीलाई ४–१ ले हराएको थियो । विजयी टोलीका लागि लक्ष्य महर्जन, सम्राट तन्डुकार, प्रजवलराज भट्ट र भार्गव सिवालले गोल गरे । क्रेस्सेन्टका लागि शोभाकर रोकायाले गोल गरेका थिए ।
विजयी टोलीका रिमोन मानन्धर म्यान अफ दी म्याच घोषित भएका थिए । प्रतियोगिताको फाइनल र तेस्रो स्थानको खेल शनिबार हुने आयोजक विद्यालयले जानकारी दिएको छ।
