म्याड्रिड (एजेन्सी)– अनेक खाले चर्चा चल्ने क्रम जारी रहेपनि युरोपियन च्याम्पियन रियल म्याड्रिडलाई सुपर स्टार नेयमारलाई लिन केहि सिजन कुर्नुपर्नेमा जनाइएको छ । भविष्यमा उनी बेर्नाबेउ आउनेमा भने रियल ढुक्क जस्तै छ । नेयमार आफै सन् २०२० मा स्पेन फर्कने बताएको सञ्चारमाध्यमले उल्लेख गरेका छन् ।

यो सिजनको सुरुआतमा नेयमार बार्सिलोनाबाट कीर्तिमानी २ सय २२ मिलियन युरोमा पेरिस सेन्ट जर्मेन पुगेका थिए । नेयमार आफै कम्तीमा दुई सिजन पिएसजीमा बिताउन चाहेको बताइएको छ । त्यसपछि भने उनी रियल जाने सम्भावना छ ।

दुई वर्षपछि नेयमार रियल पुग्दा क्लबका सुपर स्टार क्रिस्टियानो रोनाल्डो ३४ वर्षका हुनेछन् । त्यसपछि स्वभाविक रुपमा नेयमारले रोनाल्डोको ठाँउ लिनेछन् । नेयमार विश्वकै सर्वाधिक कमाई गर्ने खेलाडीमा पर्न चाहन्छन् । रियलमा आबद्ध भएपनि सम्भवत उनले लियोनल मेस्सी र कालोर्स टेभेज भन्दा पनि बढी कमाउनेछन् ।

ब्राजिलियन स्टार चार वर्ष बार्सिलोनामा बिताएर पिएसजी पुगेका हुन् । त्यहाँ उनले आफ्नो प्रभाव छाडिसकेका छन् । सबै खाले प्रतियोगितामा गरि १९ खेलमा उनले १७ गोल गर्नुका साथै १३ एसिस्ट गरिसकेका छन् । पिएसजी र रियलबीच यसपटक च्याम्पियन्स लिगको अन्तिम १६ को खेल हुँदा धेरैको नजर नेयमार माथि हुनेछ ।